الماتى وبلىسىنداعى ۇلكەن اقسۋ اۋىلىنا كارانتين ەنگىزىلەدى. بۇگىن، 5 قىركۇيەك رەسپۋبليكالىق ۆەتەريناريالىق زەرتحانا 2 باس ءىرى قارا مال سىنامالارىندا ءسىبىر جاراسىنىڭ بار ەكەندىگىن راستايتىن باكتەريولوگيالىق زەرتتەۋلەردىڭ ناتيجەلەرىن الدى، دەپ حابارلايدى “ادىرنا” ۇلتتىق پورتالى.
“ۇلكەن اقسۋ اۋىلىندا ءتىرى مال مەن مال شارۋاشىلىعى ونىمدەرىن اكەلۋگە جانە اكەتۋگە تىيىم سالىندى. اۋماقتىق ۆەتەريناريالىق ينسپەكتسيا جەرگىلىكتى اكىمدىكتەردىڭ ۆەتەريناريالىق دارىگەرلەرىمەن بىرلەسىپ، مالدى اۋلالىق تەكسەرۋ، ۆاكتسيناتسيالاۋ جانە مال يەلەرىنە ءتۇسىندىرۋ جۇمىستارىن جۇرگىزەدى. تارالۋ وشاقتارىن جويۋ شارالارىن ىسكە اسىرۋ، ونىڭ ىشىندە دەزينفەكتسيا جۇرگىزۋ ءۇشىن اشم-نىڭ رەسپۋبليكالىق ەپيزووتياعا قارسى وتريادى ەلدىمەكەنگە كوشىرىلەدى. بۇل رەتتە قاجەتتى ماماندار مەن ارنايى تەحنيكا بار”، – دەلىنگەن منيسترلىك حابارلاماسىندا.
سونداي-اق، اۋىلدا ۆەتەريناريالىق باقىلاۋ جانە قاداعالاۋ كوميتەتى توراعاسىنىڭ مىندەتىن اتقارۋشى سامات تولەگەنوۆ جۇرگەنى اتاپ ءوتىلدى.
