الماتى وبلىسى، ەڭبەكشىقازاق اۋدانى، شەلەك اۋىلىنىڭ مۇعالىمدەرى كوتەرگەن ماسەلەگە قاتىستى تىڭ اقپارات تارادى، دەپ حابارلايدى "ادىرنا" ۇلتتىق پورتالى.
جۇمىسسىز قالۋ قاۋپىن ايتىپ، جان-ايقايلارىن جەتكىزگەن شەلەك اۋىلىنداعى ءاليا مولداعۇلوۆا اتىنداعى ورتا مەكتەپتىڭ ءبىر توپ ۇجىمىنىڭ اراسىنان ەكى-ۇشەۋىنىڭ، ماسەلە كوتەرىپ، ۇندەۋ جولداعانى ءۇشىن كەشىرىم سۇراعان بەينەلەرى تارادى. كادرلاردا ءبىر مۇعالىم مەن ەكى وقۋ ءىسىنىڭ ورىنباسارى اشۋعا بەرىلىپ، جالعان اقپاراتقا ەرىپ، اسىعىس ۇندەۋ جولداعاندارىن ايتادى. الايدا كوپشىلىك ۆيدەوداعى ۇستازداردىڭ سوزىنە سەنبەي، مۇعالىمدەردى ءماجبۇرلى تۇردە كەشىرىم سۇراتقىزعان دەگەن پىكىر جاۋدىرۋدا.
ەڭبەكشىقازاق اۋدانى ءبىلىم ءبولىمى باسقارماسى جەلىگە جۇكتەلگەن ۆيدەونىڭ استىنا مۇعالىمدەرگە تۇسىندىرمە جۇمىستارى جۇرگىزىلدى، جۇمىسسىزدىق قاۋپى سەيىلدى دەپ جاۋاپ قالدىرعان بولاتىن. دەگەنمەن، ساعات سانىنىڭ كەلىسىمدى تۇردە ءالى دە رەتتەلمەگەنى، شارا قولدانىلماعانى ايتىلۋدا.
"شەلەك اۋىلىنداعى ءاليا مولداعۇلوۆا اتىنداعى ورتا مەكتەپ مۇعالىمدەرىنىڭ وتىنىشىمەن الماتى وبلىسى ەڭبەكشىقازاق اۋداندىق ءبىلىم ءبولىمىنىڭ باسشىسىمەن كەزدەسۋ ءوتتى. كەزدەسۋ بارىسىندا ۇستازدار قاۋىمى اعىمداعى جاعداي جانە بەينەۇندەۋدە ايتىلعان ماسەلەلەر بويىنشا تۇسىنىكتەمە الدى.
ءبىلىم ءبولىمىنىڭ باسشىسى، بۇگىنگى كۇنگە دەيىن ءا.مولداعۇلوۆا اتىنداعى ورتا مەكتەپتەن 279 وقۋشى مەن 12 مۇعالىمنىڭ جاڭا مەكتەپكە اۋىسقانىن جانە مۇعالىمدەردىڭ جۇمىس ۋاقىتىنىڭ قىسقارۋ قاۋپى جوق ەكەنىن اتاپ ءوتتى. بۇگىنگى تاڭدا ءا.مولداعۇلوۆا اتىنداعى ورتا مەكتەپتە 543 وقۋشى ءبىلىم الۋدا. الداعى ۋاقىتتا دا، اتالعان مەكتەپتىڭ وقۋشىلارى جاڭا مەكتەپكە اۋىسقان جاعدايدا، مۇعالىمدەر جۇمىسپەن قامتىلاتىن بولادى.
قازىرگى ۋاقىتتا مەكتەپتەگى وقۋ ءۇردىسى بەكىتىلگەن كەستەگە سايكەس جۇرگىزىلۋدە" دەلىنگەن رەسمي مالىمدەمەدە.
ەسكە سالا كەتەيىك، كەشە 4 قىركۇيەك كۇنى شەلەك اۋىلىندا جاڭادان سالىنعان ءابدۋالي قايدار اتىنداعى ورتا مەكتەپتىڭ اشىلۋىنا بايلانىستى ءاليا مولداعۇلوۆا اتىنداعى ورتا مەكتەپ ۇستازدارى ساعات سانىنىڭ ازايۋىن ايتىپ، جارتى ۇجىمنىڭ جۇمىسسىز قالۋ ماسەلەسىن كوتەرىپ، مەملەكەت باسشىسىنا ۇندەۋ جولداعان بولاتىن. الايدا، ارتىنشا جەلىگە جۇكتەلگەن ۆيدەونىڭ وبلىستىق ءبىلىم باسقارماسىنىڭ قىسىمىمەن وشىرىلگەنى ايتىلدى.
