اقتوبە وبلىسىندا مەكتەپتە تۋىنداعان جانجالدان كەيىن 9-سىنىپ وقۋشىسى كوز جۇمدى. اۋىل مەكتەبىنىڭ 18 وقۋشىسىنان جاۋاپ الىنىپ، 2 ادام كۇدىكتى رەتىندە قامالدى، دەپ حابارلايدى "ادىرنا" ۇلتتىق پورتالى.
پوليتسيا دەپارتامەنتىنىڭ دەرەگىنشە، جاسوسپىرىمدەر اراسىنداعى توبەلەس 2 قىركۇيەك كۇنى تۇندە اقتوبە وبلىسى، تەمىر اۋدانى، قوپا اۋىلىندا تىركەلدى.
توبەلەس سالدارىنان جان تاپسىرعان وقۋشى قازان ايىندا 15 جاسقا تولاتىن ەدى. مارقۇمنىڭ تۋىستارى ازىرگە ەشقانداي پىكىر بىلدىرە المايتىنىن، تەرگەۋ امالدارىنىڭ ناتيجەسىن كۇتەتىنىن ايتتى. تەمىر اۋدانى اكىمدىگىنىڭ ايتۋىنشا، جانجالدىڭ نەدەن شىققانى ازىرگە بەلگىسىز. وقيعادان كەيىن 18 بالا اۋداندىق پوليتسيا بولىمىنە جەتكىزىلدى.
“جاسوسپىرىمدەر اراسىندا ءبىر-بىرىمەن كەلىسپەۋشىلىك بولدى. ءمان-جاي تەرگەۋ كەزىندە انىقتالادى. كەشە اتا-انالارىمەن بىرگە 18 بالانى مەكتەپ اۆتوبۋسىمەن اۋداندىق پوليتسيا بولىمشەسىنە الىپ كەلدىك. قازىر ارقايسىسىنان جاۋاپ الىپ جاتىر. قالاي بولعانى ازىرگە بەلگىسىز. ول جەردىڭ بالالارىنىڭ ءبارى تاتۋ، الدىڭعى قاتارداعى اۋىل ەدى. بالالاردىڭ ءبارى سپورتقا جاقىن، ۆولەيبول، فۋتبول، تەننيس ويىندارىنا بەلسەنە قاتىساتىن”، – دەدى تەمىر اۋدانى اكىمىنىڭ ورىنباسارى قايرات نۇرالى.
اقتوبە وبلىستىق ءبىلىم باسقارماسى وقىس وقيعادان كەيىن زەردەلەۋ جۇمىستارىنىڭ كۇشەيگەنىن حابارلايدى.
“تەمىر اۋدانى، قوپا اۋىلىندا كامەلەتكە تولماعان وقۋشىلار اراسىندا توبەلەس بولىپ، 9-سىنىپ وقۋشىسى وقيعا ورنىندا كوز جۇمدى. وقىس وقيعا بويىنشا قوپا اۋىلىنا ءبىلىم باسقارماسى باسشىسىنىڭ ورىنباسارى جەتەكشىلىگىمەن جۇمىس توبى جەتىپ، زەرتتەۋ جۇمىسىن جۇرگىزىپ جاتىر. جۇمىس توبىنىڭ قۇرامىندا اقتوبە وبلىسى بويىنشا بالا قۇقىقتارى جونىندەگى ۋاكىل دە بار. سونداي-اق اتالعان ماسەلەگە قاتىستى قىلمىستىق ءىس قوزعالىپ، تەرگەۋ امالدارى باستالدى”، – دەپ حابارلايدى ءبىلىم باسقارماسى.
اقتوبە وبلىستىق پد وقيعادان كەيىن قىلمىستىق ءىس قوزعالعانىن جانە ەكى كۇدىكتى قاماۋعا الىنعانىن جەتكىزدى.
“كامەلەتكە تولماعان بالانىڭ قايتىس بولۋ فاكتىسى بويىنشا تەمىر اۋدانى پوليتسيا بولىمىمەن قىلمىستىق ءىس قوزعالدى. جانجالدىڭ بارلىق قاتىسۋشىسى انىقتالىپ، پوليتسياعا جەتكىزىلدى. ەكى كۇدىكتى ۇستالدى. تەرگەۋ ارەكەتتەرى جۇرگىزىلدى. وزگە اقپارات تەرگەۋ مۇددەسى ءۇشىن جاريالانبايدى”، – دەدى وبلىستىق پوليتسيا دەپارتامەنتىنىڭ ءباسپاسوز قىزمەتى.
