ءبىلىم سالاسىن تسيفرلاندىرۋ اكادەميالىق ادالدىققا اسەر ەتپەۋى ءتيىس. بۇل جونىندە اقتاۋدا وتكەن «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ ءداستۇرلى تامىز كەڭەسىندە باسقارما توراعاسى ءانۋار جانعوزين ايتتى.
كەيىنگى جىلدارى جاساندى ينتەللەكتى ءبىلىم سالاسىندا قولدانۋ كەڭ ەتەك العان. سوندىقتان پلاگيات، اۆتورلىق قۇقىق، ونەرتابىستى قورعاۋ مەن جاس ۇرپاقتىڭ كرەاتيۆتى ويلاۋ داعدىلارىن دامىتۋ سىندى ماسەلەلەر تۋىنداپ وتىر. الايدا وقۋشىلاردى تسيفرلىق يگىلىكتى اكادەميالىق ادالدىق قاعيدالارىن ەسكەرە وتىرىپ پايدالانۋعا ۇيرەتۋ ماڭىزدى. «جاڭا تەحنولوگيالار زامانىنداعى اكادەميالىق ادالدىق» تاقىرىبىنداعى اۋقىمدى كونفەرەنتسيا وسى ماقساتتا ۇيىمداستىرىلدى.
پەداگوگتەر ءۇشىن ماڭىزدى جيىنعا ماڭعىستاۋ وبلىسى اكىمىنىڭ ورىنباسارى زۆيرا ەسبەرگەنوۆا، ءبىلىم بەرۋدى تۇراقتى دامىتۋ قورىنىڭ ديرەكتورى دانيار توقتارباەۆ، اكادەميالىق ادالدىق ليگاسىنىڭ جوبالىق كەڭسەسىنىڭ باسشىسى نۇرگۇل ماحانباەۆا، استانا IT ۋنيۆەرسيتەتىنىڭ ۇزدىكسىز ءبىلىم بەرۋ ساندىق ينستيتۋتىنىڭ ديرەكتورى ەرمەك ءالىمجانوۆتار توبە كورسەتتى. سونداي-اق شاراعا بارلىق وڭىرلەردەگى زياتكەرلىك مەكتەپتەردىڭ 100-گە جۋىق پەداگوگى قاتىسىپ، 3500 مۇعالىم قاشىقتان تىڭدادى.
تامىز كونفەرەنتسياسى – ءبىلىم بەرۋدەگى وزەكتى ماسەلەلەردى تالقىلاۋ ءۇشىن نازارباەۆ زياتكەرلىك مەكتەپتەرىنىڭ بارلىق مۇعالىمدەرىن بىرىكتىرەتىن ءداستۇرلى الاڭ. پەداگوگتەر قاۋىمى ءۇشىن ماڭىزدى جيىننىڭ العىسوزىندە NIS باسقارما توراعاسى ءانۋار جانعوزين ەلىمىزدەگى ءبىلىم ساپاسىن دامىتۋدا زياتكەرلىك مەكتەپتەردىڭ ۇلەسىن ءسوز ەتىپ، بىرقاتار الەۋمەتتىك جوبالاردىڭ ىسكە اسىرىلۋ بارىسىن باياندادى. سونداي-اق پرەزيدەنت تاپسىرماسى اياسىندا قولعا الىنعان كادرلىق رەزەرۆتى قالىپتاستىرۋ باعىتىنداعى «ءبىلىم بەرۋ وزگەرىستەرىنىڭ 1000 كوشباسشىسى» جوباسىنىڭ ناتيجەلەرىمەن ءبولىستى.
«بۇگىنگە دەيىن وسى جوبا اياسىندا 438 پەداگوگ بىلىكتىلىگىن ارتتىرىپ، ولاردىڭ 150-ءى مەكتەپ ديرەكتورى لاۋازىمىنا تاعايىندالدى. بۇگىندە تاعى 159 مەكتەپ ديرەكتورى ورىنباسارلارى وقۋ كۋرستارىنان ءوتىپ جاتىر. سونىمەن بىرگە بيىل ءبىز ماڭعىستاۋ وبلىسىندا تىرەك مەكتەپتەر جەلىسىن قالىپتاستىرۋدى كوزدەيتىن «وتپان» جوباسىن جۇزەگە اسىرا باستادىق. بۇل جوبا ارقىلى 45 مەكتەپكە ارنايى ادىستەمەلىك قولداۋ كورسەتىپ وتىرمىز. «امانات» پارتياسىمەن بىرلەسىپ ىسكە اسىرىلىپ جاتقان «باققۋاتتى ايماق» جوباسىن جاقىندا عانا باستادىق. بۇل دا ءبىزدىڭ تاجىريبەنى تاراتۋداعى جۇمىسىمىزدا ەرەكشە ورىن الاتىن جوبا»، – دەپ اتاپ ءوتتى ول.
زياتكەرلىك مەكتەپتەر ءجاي عانا وقۋ وشاعى ەمەس، ءبىلىم سالاسىنا مونيتورينگ جۇرگىزىپ، ەلىمىزدىڭ ورتا مەكتەپتەرىنە ادىستەمەلىك قولداۋ كورسەتە الاتىن ۇيىم رەتىندە قالىپتاستى. بۇل جونىندە ءبىلىم بەرۋدى تۇراقتى دامىتۋ قورىنىڭ ديرەكتورى دانيار توقتارباەۆ جيىن بارىسىندا اتاپ ءوتىپ، NIS جۇيەسىنىڭ ورتا مەكتەپتەردىڭ دامۋىنا قوسىپ وتىرعان پايداسىنا ەرەكشە ەكپىن بەردى. سونداي-اق ءبىلىم ۇياسىمەن بىرلەسە اتقارىلىپ جاتقان «اۋىلدىق جەرلەردە تىرەك مەكتەپتەردىڭ الەۋەتىن دامىتۋ» الەۋمەتتىك جوباسىنىڭ ماڭىزىنا توقتالدى.
پلەنارلىق وتىرىستار اياسىندا ۇيىمعا قاراستى ءبىلىم بەرۋ باعدارلامالارى ورتالىعى ديرەكتورىنىڭ ورىنباسارى گاليا الجانوۆا «NIS-Programme» ءبىلىم بەرۋ باعدارلاماسىن اياسىندا اكادەميالىق ادالدىقتى يگەرۋ قاعيدالارى جايىندا ەگجەي-تەگجەيلى اقپارات بەردى. مۇنان بولەك، الەمدە اكامەديالىق ادالدىق پرينتسيپتەرىنىڭ قالاي ساقتالاتىنى جايىندا ساراپتامالىق ماتەريالدارىمەن بولىسكەن باسقارۋشى ديرەكتور دانيار تەمىرتاسوۆ شاكىرتتەردى جاستايىنان اۆتورلىق قۇقىقتى ساقتاۋعا ۇيرەتۋدىڭ مەملەكەتتىك دەڭگەيدە ماڭىزىنا توقتالدى. ءبىلىم بەرۋدەگى تسيفرلاندىرۋدىڭ ءتيىمدى تۇستارىنىڭ ءبىرى – BeyimTech ونىمدەرى دە تانىستىرىلدى.
ايتا كەتەيىك، كونفەرەنتسيا بارىسىندا نازارباەۆ زياتكەرلىك مەكتەپتەرىنىڭ ماماندارى ءبىلىم ساپاسىن دامىتۋعا قوسقان ۇلەسى ءۇشىن وقۋ-اعارتۋ مينيسترلىگىنىڭ «ەڭبەك ارداگەرى»، «ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىسىمەن ماراپاتتالدى. مۇنان بولەك، كونفەرەنتسيانىڭ پلەنارلىق وتىرىسىندا «تابىستى تاجىريبەلەر پانوراماسىنىڭ» ەڭ ۇزدىك كەيستەرى انىقتالدى.
بەس كۇن بويى زياتكەرلىك مەكتەپتەردىڭ پەداگوگتەرى وتكەن وقۋ جىلىندا اتقارىلعان جۇمىستاردى ساراپتاپ، ءبىلىم بەرۋدەگى تسيفرلاندىرۋ، ەمتيحاندار مەن دارىستەر بارىسىندا اكادەميالىق ادالدىق قاعيداتتارىن ساقتاۋ ماسەلەلەرىن قاراستىردى.
