بۇگىن، 28 تامىز - كورنەكتى مەملەكەت جانە قوعام قايراتكەرى وزبەكالى جانىبەكوۆتىڭ تۋعان كۇنى، دەپ حابارلايدى "ادىرنا" ۇلتتىق پورتالى.
وزبەكالى جانىبەكوۆ 1931 جىلى تۇركىستان وبلىسى وتىرار اۋدانى سارىقامىس اۋىلىندا دۇنيەگە كەلگەن. ەتنوگراف، تاريح عىلىمدارىنىڭ كانديداتى. قازاق حالقىنىڭ ۇلتتىق مادەنيەتىنىڭ، انا ءتىلىنىڭ، ءداستۇرى مەن ادەت-عۇرپىنىڭ جاڭارىپ، دامۋىنا ەلەۋلى ۇلەس قوسقان مەملەكەت قايراتكەرى.
20 عاسىردىڭ 70-جىلدارىنىڭ وزىندە-اق قوجا احمەت ياساۋي كەسەنەسىنىڭ قالپىنا كەلتىرىلۋىنە ۇيىتقى بولدى. وزبەكالى جانىبەكوۆتىڭ باستاماسىمەن قازاقستاننىڭ كوپتەگەن قالالارىندا ەتنوگرافيالىق مۇراجايلار اشىلدى، قازاقستاننىڭ تاريحي جانە مادەني ەسكەرتكىشتەرىن ساقتاۋ مەن قالپىنا كەلتىرۋ ماقساتىن كوزدەگەن “ارقاس” قوعامى قۇرىلعان.
جانىبەكوۆ “شەرتەر”، ادىرنا”، “التىناي”، ت.ب. فولكلورلىق ونەر انسامبلدەرىن ۇيىمداستىردى. “ناۋرىز” مەيرامىنىڭ، م.دۋلاتوۆ، ج.ايماۋىتوۆ، م.جۇماباەۆ، ش.قۇدايبەرديەۆ ەسىمدەرىنىڭ حالقىنا قايتا ورالۋىنا بەلسەنە ات سالىستى. انا ءتىلىن دامىتۋ باعدارلاماسىنىڭ مەملەكەتتىك تۇجىرىمداماسىن جاساۋعا قاتىستى.
“قازاقتىڭ ۇلتتىق قول ونەرى” “جاڭعىرىق”، “ۋاقىت كەرۋەنى”، “جولايرىقتا”، “قازاق كيىمى”، “ەجەلگى وتىرار”، “تاعدىر تاعىلىمى” ەڭبەكتەرىنىڭ اۆتورى.
بىرنەشە رەت ەڭبەك قىزىل تۋ وردەنىمەن، مەدالدەرمەن ماراپاتتالعان.
قازاق حالقىنىڭ ۇلتتىق مادەنيەتى مەن ادەت-عۇرپىنىڭ جاڭارىپ، دامۋىنا ەلەۋلى ۇلەس قوسقان قايراتكەر 1998 جىلى دۇنيەدەن وتكەن.
