باتىس قازاقستاندا ءتورت ادامنىڭ ءومىرىن جالماعان جول اپاتى ورىن الدى، دەپ حابارلايدى "ادىرنا" ۇلتتىق پورتالى.
جول-كولىك وقيعاسى 24 تامىز كۇنى تاڭعى 7.00 شاماسىندا جالپاقتال كەنتىنىڭ ماڭىندا بولعان. كازتالوۆكا-ورال تاس جولىندا اۆتوكولىك جول بويىندا تۇرعان ءشوپ تيەلگەن جۇك كولىگىمەن سوقتىعىسقان.
ءتورت ادام وقيعا ورنىندا ءتىل تارتپاي كەتتى،.
قازا تاپقانداردىڭ اراسىندا كازتالوۆ پوليتسيا ءبولىمىنىڭ ءبىرىنشى ورىنباسارى، پوليتسيا مايورى مارلەن قاراباەۆ تا بولعان. ونىمەن بىرگە كولىكتە بولعان جۇبايى دا قايتىس بولدى.
مارقۇمداردىڭ ارتىندا بەس بالاسى جەتىم قالدى.
ۋرالسكايا نەدەليا باسىلىمىنىڭ مالىمەتىنشە، كولىكتە قايتىس بولعانداردىڭ بارلىعى سىنىپتاستار. پوليتسەي وتباسىنان بولەك، قازا تاپقانداردىڭ ىشىندە ەرلى-زايىپتى بولعان. ولاردىڭ سوڭىندا جەتى بالاسى قالدى.
ايتا كەتەيىك، مەركى-شۋ-بۋرىلبايتال تاس جولىندا بولعان جول اپاتىنان التى ادام قازا تاپتى، ونىڭ ىشىندە ەكى پاترۋل بولعانىن جازعان ەدىك. تويوتا الفارد جۇرگىزۋشىسى قارسى جولاققا شىعىپ كەتىپ، پوليتسيانىڭ "Skoda Octavia" پاترۋلدىك كولىگىمەن سوقتىعىسقان.
