انتيكور «استانا LRT» جشس باسقارماسىنىڭ بۇرىنعى توراعاسى تالعات ارداندى تەرگەۋگە شاقىردى، - دەپ حابارلايدى “ادىرنا” ۇلتتىق پورتالى انتيكور اقپاراتىنا سىلتەمە جاساپ.
سىبايلاس جەمقورلىققا قارسى ءىس-قيمىل اگەنتتىگى «استانا LRT» جشس باسقارمانىڭ بۇرىنعى توراعاسى تالعات اردانعا قاتىستى قىلمىستىق ءىستى تەرگەۋدە.
«قازىرگى ۋاقىتتا اۋىر قىلمىس جاساۋ بويىنشا تەرگەۋ بارىسىندا جينالعان دالەلدەمەلەر كۇدىكتى اردان ت.-نىڭ ارەكەتىن قىلمىستىق كودەكستىڭ 361-بابىنىڭ 4-بولىگى، 3-تارماعى «قىزمەتتىك وكىلەتتىكتەردى تەرىس پايدالانۋ» بويىنشا سارالاۋعا مۇمكىندىك بەردى. قىلمىستىق ءىس جۇرگىزۋ كودەكسىنىڭ 208-بابىنىڭ 1-بولىگىنە سايكەس، كۇدىكتى سوتقا شاقىرۋ قاعازىمەن جاۋاپ الۋعا شاقىرىلادى. الايدا، كۇدىكتى اردان ت.-نىڭ قازاقستان رەسپۋبليكاسىنان تىس جەردە بولۋىنا جانە شاقىرتۋدان جالتارۋىنا بايلانىستى سىبايلاس جەمقورلىققا قارسى قىزمەت قىلمىستىق ءىس جۇرگىزۋ كودەكسىنىڭ 205-بابىنىڭ 3-بولىگىن باسشىلىققا الا وتىرىپ، كۇدىكتىنى سوتقا شاقىرۋ تۋرالى حابارلاما جاريالايدى»، - دەلىنگەن انتيكور تاراتقان حابارلامادا.
انىقتالعانداي، جاۋاپ الۋ جانە كۇدىكتىنىڭ ارەكەتىن سارالاۋ تۋرالى قاۋلىنى جاريالاۋ ءۇشىن تالعات اردان 2024 جىلعى 23 تامىزدا ساعات 09:00-دە قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ اكىمشىلىك عيماراتىنا كەلۋى كەرەك.
ەسكە سالا كەتەيىك، تالعات ارداننىڭ بەس جىلداي ىزدەۋدە جۇرگەنى بۇعان دەيىن حابارلانعان بولاتىن. 2023 جىلدىڭ مامىرىندا استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتى LRT ءىسى بويىنشا ايىپتالۋشىلار تالعات اردان مەن قانات سۇلتانبەكوۆكە سىرتتاي ۇكىم شىعارعان ەدى.
