Antikor «Astana LRT» JŞS basqarmasynyŋ būrynǧy töraǧasy Talǧat Ardandy tergeuge şaqyrdy, - dep habarlaidy “Adyrna” ūlttyq portaly Antikor aqparatyna sılteme jasap.
Sybailas jemqorlyqqa qarsy ıs-qimyl agenttıgı «Astana LRT» JŞS basqarmanyŋ būrynǧy töraǧasy Talǧat Ardanǧa qatysty qylmystyq ıstı tergeude.
«Qazırgı uaqytta auyr qylmys jasau boiynşa tergeu barysynda jinalǧan däleldemeler küdıktı Ardan T.-nyŋ äreketın Qylmystyq kodekstıŋ 361-babynyŋ 4-bölıgı, 3-tarmaǧy «Qyzmettık ökılettıkterdı terıs paidalanu» boiynşa saralauǧa mümkındık berdı. Qylmystyq ıs jürgızu kodeksınıŋ 208-babynyŋ 1-bölıgıne säikes, küdıktı sotqa şaqyru qaǧazymen jauap aluǧa şaqyrylady. Alaida, küdıktı Ardan T.-nyŋ Qazaqstan Respublikasynan tys jerde boluyna jäne şaqyrtudan jaltaruyna bailanysty Sybailas jemqorlyqqa qarsy qyzmet Qylmystyq ıs jürgızu kodeksınıŋ 205-babynyŋ 3-bölıgın basşylyqqa ala otyryp, küdıktını sotqa şaqyru turaly habarlama jariialaidy», - delıngen Antikor taratqan habarlamada.
Anyqtalǧandai, jauap alu jäne küdıktınıŋ äreketın saralau turaly qaulyny jariialau üşın Talǧat Ardan 2024 jylǧy 23 tamyzda saǧat 09:00-de Qazaqstan Respublikasy Sybailas jemqorlyqqa qarsy ıs-qimyl agenttıgınıŋ äkımşılık ǧimaratyna keluı kerek.
Eske sala keteiık, Talǧat Ardannyŋ bes jyldai ızdeude jürgenı būǧan deiın habarlanǧan bolatyn. 2023 jyldyŋ mamyrynda Astananyŋ qylmystyq ıster jönındegı mamandandyrylǧan audanaralyq soty LRT ısı boiynşa aiyptaluşylar Talǧat Ardan men Qanat Sūltanbekovke syrttai ükım şyǧarǧan edı.
Ūqsas jaŋalyqtar
