اتوم ەنەرگەتيكاسى سالاسىنداعى جاڭا جوبالار قازاقستاننىڭ ەكولوگيالىق جانە ەكونوميكالىق تۇراقتىلىعىن نىعايتۋ ءۇشىن ماڭىزدى قادام بولىپ تابىلادى. وسىعان بايلانىستى الماتىدا قوعامدىق كەڭەس پەن الماتى ازاماتتىق اليانس بىرلەستىگى ۇيىمداستىرعان جاريا تالقىلاۋ ءوتتى. قوعامدىق تىڭداۋلار بارىسىندا اتوم ەلەكتر ستانتسيالارىنىڭ ەكولوگيالىق تازا ەنەرگيا كوزى رەتىندەگى ارتىقشىلىقتارى اتاپ ءوتىلدى.
ساراپشىلاردىڭ پىكىرىنشە، اتوم ەلەكتر ستانتسيالارى جاھاندىق جىلىنۋ مەن كليماتتىڭ وزگەرۋىنىڭ نەگىزگى سەبەپتەرى بولىپ تابىلاتىن كومىرقىشقىل گازىن، مەتاندى جانە باسقا پارنيكتىك گازداردى شىعارمايدى. "بۇل ولاردىڭ اتموسفەراعا زيانىن ازايتۋ جانە دەكاربونيزاتسياعا جەتۋ ءۇشىن كۇرەستە ماڭىزدى قۇرال", — دەپ اتاپ ءوتتى گۇلميرا مۋرسالوۆا.
قازاقستان رەسپۋبليكاسى ەنەرگەتيكا مينيسترلىگى اتوم ەنەرگەتيكاسى جانە ونەركاسىپ دەپارتامەنتى ديرەكتورىنىڭ ورىنباسارى گۇلميرا مۋرسالوۆا ءارتۇرلى ەنەرگيا كوزدەرىنىڭ ەكولوگياعا اسەرى تۋرالى ستاتيستيكالىق دەرەكتەردى ۇسىندى. ونىڭ ايتۋىنشا، قازاقستاندا كومىرقىشقىل گازى شىعارىندىلارىنىڭ 80% - ى ەنەرگەتيكا سەكتورىنا تيەسىلى. "جاسىل ەنەرگيا ستانتسيالارىن قۇرۋ ارقىلى ءبىز كومىرقىشقىل گازىنىڭ شىعارىندىلارىن 70 ميلليون تونناعا دەيىن ازايتا الامىز", - دەدى ول. جاسىل ەنەرگيا كوزدەرىنە كۇن، جەل، سۋ ەلەكتر ستانتسيالارى، سونداي-اق اتوم ەلەكتر ستانتسيالارى كىرەدى. ساراپشى اتوم ەلەكتر ستانتسياسىنىڭ قۇرىلىسى الداعى رەفەرەندۋمنىڭ وڭ ناتيجەسى بولعان جاعدايدا عانا جۇزەگە اسىرىلاتىنىن ەسكە سالدى.
ەستەرىڭىزگە سالا كەتەيىك، قازاقستاندا اەس سالۋ بويىنشا جوبالاردى ىسكە اسىرۋ جوسپارلانۋدا. وسىعان بايلانىستى جاقىن ارادا رەفەرەندۋم وتەدى. الماتىداعى جاريا تىڭداۋلار قازاقستاندا ەسەپ بويىنشا ون توعىزىنشى.
