اقتاۋداعى جاعاجايلاردىڭ بىرىندە ەر ادام ايەلدى ۇرىپ، مۇرنىن سىندىرعانى تۋرالى باق بەتتەرىندە اقپارات تارادى، دەپ حابارلايدى “ادىرنا” ۇلتتىق پورتالى Lada-عا سىلتەپ.
جەكە جاعاجايلاردىڭ بىرىندە قۇربىسى، اپكەسى جانە بالاسىمەن دەمالىپ جاتقان تۇرعىنعا بەلگىسىز ەر ادام شابۋىل جاساعان كورىنەدى. جابىرلەنۋشىنىڭ سوزىنشە ول اۋىر جاراقات العان.
"ولار ءبىزدى ۆيدەوعا ءتۇسىرىپ، كۇلدى. اپكەم ولارعا ۇرىسىپ، جانجال شىقتى. ول كەزدە مەن بالامەن وتىرعانمىن. سوسىن جاعدايعا ارالاسىپ، ولاردى تىنىشتاندىرۋ ءۇشىن جاندارىنا كەلدىم. سوسىن الدىمنان ماس ەر ادام شىعىپ، بەتىمنەن ۇردى. جەرگە قۇلاپ، مۇرنىم سىنىپ، بەتىم قانعا بويالدى. ول سوندا دا توقتاماي ۇرا بەردى", - دەيدى ايەل.
وقيعا بولعان ساتتە شاپا شەكتىم دەگەن ايەلدىڭ اپكەسى جۇدىرىق الا جۇگىرگەن ەر ادامدى بەينەگە ءتۇسىرىپ العانىن ايتادى.
"ول ونىڭ تەلەفونىن تارتىپ الىپ، تەڭىزگە لاقتىرىپ جىبەردى. ال قاسىندا تۇرعان جىگىتكە كولىكتەن مىلتىق اكەلۋدى بۇيىردى. وسىدان كەيىن پوليتسيا شاقىردىق. سوسىن ول كەتىپ قالدى", – دەيدى جابىرلەندىم دەگەن ايەل.
قىز اۋىر جاراقات الىپ، اۋرۋحانادا ءبىر اپتا بويى جاتقانىن ايتتى.
"دەنساۋلىعىما ايتارلىقتاي زاقىم كەلدى. مۇرىن سىنعان، ۇزىندىعى 4,5 سانتيمەتر كەسىلگەن. مەنىڭشە ونىڭ قولىندا وتكىر زات بولعان سياقتى. الايدا پوليتسەيلەر وعان جەڭىل ايىپ تاعىپ وتىر. مەنىڭ ويىمشا، تەرگەۋ دۇرىس جۇرگىزىلمەدى. وسى ۋاقىت ىشىندە ول كەشىرىم سۇرامادى جانە ىستەگەن ىسىنە وكىنبەيتىن كورىنەدى", - دەيدى ول.
قازىر قىزعا قول كوتەرگەن كۇدىكتى انىقتالعانىن ايتادى.
"ادىرنا" ۇلتتىق پورتالىنىڭ تىلشىسىنە "ۇلىما جالا جاپتى" دەگەن اقپاراتپەن اقتاۋ قالاسىنىڭ تۇرعىنى حابارلاستى. ايەل ۇلىنىڭ قىزدى ۇرماعانىن ايتىپ، باق-قا جالعان اقپاراتتى تاراتپاۋدى سۇرايدى. ايەلدىڭ سوزىنشە،"جابىرلەندىم" دەپ ايىپ تاققان ادامعا ۇلى قول كوتەرمەگەن. ودان بولەك، ەكىنشى تاراپ "جابىرلەنۋشى" ايەلدىڭ ماس كۇيدە بولعانىن ايتادى.
"بولماعاندى بولدى قىلىپ، اق دەگەنىڭە قارا جوق قىلىپ حالىققا ايتىپ وتىر. بۇل وقيعا 06.08.24 جىلى “دوستار” تەڭىز جاعالاۋىندا ورىن الدى. جىگىتتىڭ اناسى، اپكەسى جانە بالالارى دەمالۋعا كەلەدى. ولار دەمالىس ايماعىندا جالعا بەرىلەتىن اتكەنشەكتى جالدايدى دا، كەزەگى كەلگەنشە كۇتىپ وتىرادى. ۋاقىتى كەلىپ اتكەنشەككە بارسا، ءۇش ماس كۇيدەگى ايەل كىسىلەر كەزەكتى ساقتاماي جانجالمەن وتىرىپ الادى. جىگىتتىڭ اناسى مەن اپاسى ەرەگىس تۋىنداتپاۋ ءۇشىن ولاردىڭ تۇسكەنىن كۇتەدى. ۋاقىتى بىتكەسىن ەكى ايەل كىسى ورىندى بوساتادى. بىراق، مىنا ۆيدەوداعى ايەل ورىندى بوساتپاي تاعى دا جالدايمىن دەپ ۇرىس شىعارادى.
ءوز ورنىن سۇراعان تاراپقا بالاعات سوزدەر ايتىپ، بىلاپىت سوزدەرىن جاۋدىرادى. جىگىتتىڭ اناسى ۆيدەوعا ءتۇسىرىپ، اتكەنشەكتى بوساتۋىن سۇرايدى. ۆيدەوداعى ايەل ادام ءوزىنىڭ اپكەسىنە بولعان جايتتى ايتادى. ول كىسى بىزگە كەلىپ ۆيدەونى “نەگە تۇسىردىڭدەر؟-دەپ ۇرىس شىعارىپ، جىگىتتىڭ اپكەسىن شاشىنان تارتىپ سۋعا تۇنشىقتىرادى. اراشا تۇسكەن جىگىتتىڭ اناسىن يتەرىپ قۇلاتىپ توبەلەس باستايدى. ونى كورگەن جىگىت جاعالاۋدان جۇگىرىپ كەلىپ ايىرماقشى بولادى. سول ساتتە ۆيدەوداعى ايەل ول جىگىتتىڭ بەتىنەن ەكى رەت ۇرىپ بوقاۋىز سوزدەرىمەن جىگىتتىڭ اشۋىنا تيەدى. اشۋعا بەرىلگەن جىگىت ايەلگە قول كوتەرۋگە ءماجبۇر بولادى. سوسىن ەكى ايەل جىگىتتىڭ اناسىنا تاعى قول كوتەرىپ دەنەسىنە زيان كەلتىرەدى. سول ساتتە بالالار جىلاپ مازاسىزدانعان سوڭ تەزىرەك كەتۋدى ويلايدى. سوندا دا ۇرىستى توقتاتپاي ۆيدەوعا ءتۇسىرىپ “كەتپەيسىڭدەر”-دەپ ارتىنان قالمايدى", - دەپ جازىلعان جىگىتتىڭ اناسى تاراتقان حابارلامادا.
ايەل ادام "بالام ءبىزدى قورعاماق بولدى، ول جۇدىرىقپەن ۇرىپ تاستاماسىن دەپ ءبولىپ الىپ كەتتىم" دەيدى.
ءىستىڭ قالاي ءوربىپ جاتقانى ازىرگە بەلگىسىز.
