وزبەكستان بىزدەن مەدال جاعىنان وزىپ كەتتى دەپ جانىعىپ جاتقانداردى تۇسىنبەدىم. ءومىر بولعاسىن بىردە وزادى، بىردە قالادى. ءبىز بۇل جەتىستىككە باياعىدا سيدنەي، لوندون كەزىندە جەتىپ قويعانبىز.
وتكەندە Euronews ارناسى وليمپيادانىڭ مەدال كەستەسىن كورسەتتى. سوندا ءبىر قىزىق نارسە بايقادىم. نەگىزى وليمپيادا كەستەسىندە ءبىرىنشى ورىنعا قىتاي مەن اقش تالاسىپ كەلەدى. بىراق ەۆرونيۋز ءبىرىنشى ورىنعا ەۋروپالىق وداق ەلدەرىن قويىپتى. ياعني، ءبارىنىڭ مەدالىن قوسقاندا، ءتىزىمنىڭ باسىنا شىققان عوي.
كەشە عانا وزبەكستان وليمپياداداعى سەگىزىنشى التىن مەدالىن ۇتىپ الدى. وسى ورايدا، نەلىكتەن تۇركى ەلدەرىنىڭ مەدال جيىنتىعىن ساناماسقا؟! بۇل – تۇركىلىك تامىرىمىزدى بىرىكتىرۋگە ۇلەس قوساتىن ەدى. ونىڭ ۇستىنە، ءوزارا الاۋىزدىقتى ەمەس، ىنتىماقتاستىقتى ناسيحاتتايدى.
بۇل جالپىلاما جاعى عوي. پاريج وليمپياداسىنان مىنانداي جاقسى ءۇردىس بايقادىم. تۇركى ەلدەرى ءوزارا جەتىستىگىنە قۋانادى. كۇنى كەشە ەلدوس سمەتوۆ التىننان القا تاققاندا، بۇكىل تۇركى قۋاندى. سوسىن ازەربايجان بالۋانى جەڭىس تۇعىرىنا كوتەرىلگەندە قۋانباعان قازاق قالماعان شىعار. الاتاۋدىڭ ارعى بەتىندەگى اعايىنىمىز قىرعىزدارعا جانكۇيەر بولعاندار قانشاما؟!
تۇركيانىڭ مەرگەنى وليمپيادا جۇلدىزىنا اينالعاندا، نىسانا كوزدەۋدەن ءوزىمىز كۇمىس مەدال العانداي قۋاندىق. مىنە، بيىل وزبەكتەر ايدى اسپانعا ءبىر-اق شىعارىپ، 8 التىندى قورجىنىنا باستى.
وكىنىشكە قاراي، وزبەكستاننىڭ جەتىستىگىن حالىقتى ءبولىپ، ەلگە ىرىتكى سالۋعا پايدالانىپ جاتقاندار دا بار سەكىلدى. ءبىز وزبەكتەرمەن جارىسپاۋىمىز كەرەك، ولاردىڭ جەتىستىگىنە قۋانۋىمىز قاجەت. ويتكەنى بولەك مەملەكەت بولساق تا، ءتۇبىمىز ءبىر تۇركىلەرمىز.
سوسىن وزبەكستان بىزدەن وزىپ كەتتى دەگەن پىكىردى كۇن تارتىبىنە شىعارعىسى كەلەتىندەردى دە بايقادىم. كورشىمىز بايىپ جاتسا، قۋانايىق. بىراق شىن مانىندە وزبەكستان ەكونوميكالىق تۇرعىدا قازاقستاننان وزدى ما؟ مىنانداي ستاتيستيكا بار. ەكى ەلدىڭ اراسىنداعى ءوزارا ساۋدا 4,4 ميلليارد دوللاردى قۇرايدى. سونىڭ 3,1 ميلليارد دوللارى ءبىزدىڭ وزبەكستانعا ەكسپورتىمىز.
ال ورتالىق ازيا ەلدەرىندەگى 11 ميلليارد دوللار ءوزارا ساۋدانىڭ 8 ميللياردى قازاقستانعا تيەسىلى. ىشكى جالپى ءونىم، جان باسىنا شاققانداعى ىشكى ءونىم تۋرالى اڭگىمە ايتپاي-اق قويايىن. مۇنىڭ ءبارى نەنى بىلدىرەدى؟ البەتتە، قازاقستاننىڭ وڭىردەگى جەتەكشى ءرولىن كورسەتەدى.
سوندىقتان جوقتان وزگەنى ءسوز قىلىپ، وزبەكستاننان قالىپ كەتتىك دەگەن اڭگىمەنى قويۋ كەرەك. راس، مەدال كەستەسىندە ءوز اعامىز الدىمىزدا تۇر. بۇل - وكىنەتىن ەمەس، قۋاناتىن ناتيجە. سەبەبى وزبەكستان، قىرعىزستان، تۇركيا، ازەربايجان، تۇرىكمەنستان جەتىستىككە جەتىپ جاتسا، بۇل تۇركىلەردىڭ جەڭىسى. مەنىڭشە، وليمپياداداعى تۇركى اعايىندارىمىزعا قۋانا بىلسەك، بۇل – قوعامنىڭ ەسەيگەنىنىڭ بەلگىسى.
وڭعار قابدەن
