سپورت ءجۋرناليسى اينات قابيدۋللاەۆ پاريج وليمپياداسىندا ونەر كورسەتكەن قازاقستاندىق بوكسشىلار جايلى ويىن ايتتى، دەپ حابارلايدى “ادىرنا” ءتىلشىسى.
التىنسىز قالعان وتاندىق بىلعارى قولعاپ شەبەرلەرىن جۇرتشىلىق ءالى دە قىزۋ تالقىلاۋدا. سپورت ءجۋرناليسىنىڭ ايتۋىنشا ەلىمىزدە ەڭ جاقسى جاعداي بوكسشىلارعا عانا جاسالعان. الايدا ولار بۇل جاعدايدى اقتاي المادى دەيدى:
ء“بىزدىڭ بۇرىنعى بوكسشىلارىمىز لاپىلداپ جانىپ تۇراتىن. قازىر بوكسشىلارىمىز وليمپياداعا ءاتۇستى قارايتىن بولعان. وليمپياداعا كەتپەي تۇرىپ ۇنەمى ەلدە توي-تومالاقتان شىقپايدى. سونىڭ سالدارىن كورىپ وتىرمىز. ودان بولەك، بوكسشىلارعا نەگىزى بارلىق جاعداي جاسالعان. وقۋ-جاتتىعۋ جيىندارى جوعارى دەڭگەيدە وتەدى. ۆيتاميندەرى دە، تاماقتارى دا ۋاقىتىلى. پسيحولوگتارمەن دە جۇمىس جاسادى. وسىنداي كورسەتىلگەن قولداۋدان كەيىن ولار كەم دەگەندە ءبىر التىنمەن كەلۋگە مىندەتتى ەدى” دەدى ول.
سونداي-اق، جۋرناليست ءبىزدىڭ بوكسشىلاردىڭ “توق” ەكەنىن ايتتى:
“سپورتشى وليمپياداعا اش بارۋى كەرەك. ءبىزدىڭ بوكسشىلاردىڭ جاعدايى جاقسى. ءبارى توق. قاراپايىم ليتسەنزيا العان كۇننەن-اق اياقتارىن جەرگە تيگىزبەي كۇتىپ الىپ، قوماقتى سىياقى الىپ جاتتى. ونى بەرگەن دە دۇرىس قوي، بىراق وليمپيادادان كەيىن بەرىلسە باسقاشا بولار ما ەدى” دەدى اينات قابيدۋللاەۆ.
ودان بولەك فينالدىق باسەكەدە سۇرىنگەن نۇربەك ورالبايدىڭ جەڭۋىنە بولاتىنىن قوستى ول. ءجۋرناليستىڭ ايتۋىنشا، باپكەرلەر دۇرىس تاكتيكا ۇسىنباعان:
“العاشقى اينالىمنان ۇشىپ كەتىپ جاتقان بوكسشىلارىمىزدى كورىپ، كۇمىس الساق تا، التىنمەن پارا-پار بولاتىنىن ۇقتىق. نۇربەك ورالباي فينالعا شىققاندا قۋاندىق. دەسە دە، ۋكرايندىق حيجنياكتى دا جەڭۋگە بولاتىن ەدى. ونىڭ ءستيلى- تەك تومپەشتەپ ۇرۋ. باپكەرلەر نۇربەككە وسى ستيلگە ىڭعايلاپ تاكتيكا ۇسىنعاندا التىننان القا تاعىنار ما ەدىك. بۇعان باپكەرلەر كەيىن وزدەرى قوساتىنىن قوسار” دەدى ول.
سونىمەن قاتار، تورەشىلەرگە شاعىمدانعان جۇرتشىلىقتى سىنعا الدى. قازاقتار جەڭىلىستى قابىلداي المايدى دەپ سوكتى ول:
“”جەڭىلگەننىڭ ءسوزى قۇرىسىن دەمەكشى” تورەشى كىنالى دەپ جەڭىل قۇتىلۋعا بولمايدى. بوكسشىلارىمىزدىڭ ءبارى تازا جەڭىلدى. مۇحاممەدسابىر بازاربايۇلىنىڭ عانا جەكپە-جەگىن 50/50 دەپ باعالاۋعا بولادى. بىراق تورەشى گرۋزين بوكسشىسىنىڭ قولىن كوتەردى. تۋ كوتەرىپ شىققان اسلانبەك شىمبەرگەنوۆتىڭ العاشقى اينالىمنان جەڭىلۋى - ۇيات نارسە. ەل ەرىككەننەن ەشكىمگە تۋ ۇستاتپايدى. سەنىم بولعان ەدى. ودان كەيىن جەكە باپكەرلەردىڭ دە كىناسى بار. 16 بوكسشى ىرىكتەلسە سونىڭ 16-سىنا دا جەكە تاكتيكالىق دايىندىق كەرەك ەدى. بىزدىكىلەر ءبىر كۇن قالعاندا قارسىلاسىن ءبىلىپ، سوعان عانا دايىندىق جۇرگىزدى. كوپ جاعدايدا سان سوعىپ قالدىق” دەدى جۋرناليست.
