"مەدالدى سەزىنىپ ۇلگەرگەن جوقپىن. ەلگە ورالىپ، سپورتتىق گيمناستيكاعا قاتىسى بار ادامداردىڭ قولداۋىن، قۇتتىقتاۋىن كورگەندە بارىپ تۇسىنەتىن شىعارمىن. ەڭ الدىمەن ۇيلەنەمىن. سۇيىكتىم ابدەن كۇتتى. ايداعا ءۇش جىلدان بەرى وليمپيادا ويىندارى اياقتالعان بويدا وتاۋ قۇرامىز دەپ ۋادە بەرىپ كەلدىم. بۇيىرتسا، سول ۋادەمدى ورىندايمىن", - دەدى ناريمان.
قۇربانوۆ سپورتتىق كارەراسىن دا جالعاستىرىپ، الدا التىنعا قول جەتكىزۋگە مۇمكىندىگى بار ەكەنىن دە حابارلادى.
"مەنى الدا كۇتىپ تۇرعان كەلەسى وليمپيادالىق تسيكل - 26 جاستان 30 جاسقا دەيىنگى ارالىق اتتا جۇمىس ىستەيتىن گيمناست ءۇشىن شىڭ سانالادى، سوندىقتان التىن مەدال الۋعا مۇمكىندىك جوعارى", - دەدى ول.
پاريج وليمپياداسىندا جۇلدەگە يە بولعان ناريمان قۇربانوۆتىڭ سۇيىكتىسى ايدا باۋىرجانوۆا دا وزىمەن بىرگە ونەر كورسەتىپ جۇرگەن گيمناست.
