8-13 قىركۇيەك ارالىعىندا ەلوردادا 5-ءشى دۇنيەجۇزىلىك كوشپەندىلەر ويىندارى وتەدى. جارىس وتەتىن سپورت نىساندارىنىڭ ءبىرى – ج.ۇشكەمپىروۆ اتىنداعى جەكپە-جەك سارايى. مۇندا ۇلتتىق كۇرەس تۇرلەرى بويىنشا جارىستار وتەدى: قازاق كۇرەسى، كورەش جانە الىش، دەپ حابارلايدى اكىمدىكتىڭ رەسمي سايتى 5-ءشى دۇنيەجۇزىلىك كوشپەندىلەر ويىندارىنىڭ ديرەكتسياسىنا سىلتەمە جاساپ.
سپورت كەشەنى 2021 جىلدىڭ 8 قىركۇيەگىندە قابانباي باتىر داڭعىلى مەن كەرەي مەن جانىبەك حاندار كوشەلەرىنىڭ قيىلىسىندا ەل تاۋەلسىزدىگىنىڭ 30 جىلدىعىنا وراي اشىلدى.
جاقسىلىق ۇشكەمپىروۆ – كلاسسيكالىق ستيلدەگى بالۋان، وليمپيادا چەمپيونى، قازاقستاننىڭ ەڭبەك ەرى، ەڭبەك سىڭىرگەن سپورت شەبەرى، الەم چەمپيونى، قازاقستاننىڭ ەڭبەك سىڭىرگەن جاتتىقتىرۋشىسى.
جەكپە-جەك سارايى 3 294,6 شارشى مەترلىك زاماناۋي ارەنامەن جانە 5000 كورەرمەنگە ارنالعان سىيىمدىلىقپەن جابدىقتالعان. مۇندا رەسپۋبليكالىق جانە حالىقارالىق دەڭگەيدەگى جارىستار مەن چەمپيوناتتار وتكىزىلەدى.
ساراي سونىمەن قاتار اربامەن قوزعالاتىندارعا ارنالعان ارنايى ورىندارمەن، سونداي-اق ارەناعا كىرۋ ءۇشىن پانورامالىق ليفتپەن جابدىقتالعان.
ەسكە سالا كەتەيىك، ويىندارعا الەمنىڭ 89 ەلىنەن 2000-عا جۋىق سپورتشى قاتىسادى.
ويىندار ءۇش باعىت بويىنشا وتەدى – سپورت، مادەنيەت جانە عىلىم.
دۇنيەجۇزىلىك كوشپەندىلەر ويىندارىنىڭ ينفراقۇرىلىمىنا ەلوردالىق 6 نىسان كىردى: «استانا-ارەنا» ستاديونى، «قازانات» يپپودرومى، ج.ۇشكەمپىروۆ اتىنداعى جەكپە-جەك سارايى، «الاۋ» مۇز سارايى، «Qazaqstan» جەڭىل اتلەتيكالىق سپورت كەشەنى، «دۋمان» كەشەنى.
