كەيبىر ەۋروپا ەلدەرىندە انالار ۇيدە بوسانۋعا ارنايى دايىندالسا، قازاقستاندا بۇل جاعداي كەزدەيسوقتىقتپن تۋىندايدى. ادامدار پەرزەنتحاناعا جەتىپ ۇلگەرمەيدى، نەمەسە جولدا بوسانادى. ونىڭ كەرى سالدارى بولۋى مۇمكىن دەيدى مامان دارىگەر.
قازاقستاندا ۇيدە بوسانۋ، جولدا بوسانۋدىڭ ارنايى ينسترۋكتسياسى جوق دەۋگە بولادى. كوبىنە اياقاستى كەلگەن تولعاق، كەزدەيسوق بوسانۋ كەزىندە دۇنيەگە كەلگەن بالالاردىڭ دەنساۋلىعى تۋرالى دا تولىق مالىمەت جوق.
اتتىڭ جالىندا، تۇيەنىڭ قومىندا...
سوڭعى ۋاقىتتا ەلىمىزدە اۋرۋحانادان تىس جەردە بوسانۋ فاكتىلەرىنىڭ تىركەلۋ جيىلىگى ارتقان. 2014 جىلى ۇيدە بوسانعان ايەلدەر سانى 80-گە جۋىقتاسا، 2017 جىلى ءبىر عانا اتىراۋ وبلىسىندا 52 انا نارەستەسىن ۇيدە دۇنيەگە اكەلگەن.
بيىل دا بۇل كورسەتكىش ازايماي تۇر. ماسەلەن، جىل باسىنان بەرى پاۆلودار وبلىسىنىڭ وزىندە ءۇي جاعدايىندا جانە جەدەل جاردەم كولىگىندە تۋىلعان 20 ءسابي انىقتالعان.
سونىمەن قاتار، 2021-2024 جىلدار ارالىعىندا قازاقستاندا پويىزدا 11 ءسابي دۇنيەگە كەلگەن.
جاقىندا عانا الماتى وبلىسىندا مەديتسينا قىزمەتكەرلەرى تولعاعى جەتكەن ايەلدى ۇيىندە بوساندىرۋعا ءماجبۇر بولسا، ماڭعىستاۋ وبلىسىندا جۇكتىلىكتىڭ 37-اپتاسىنداعى ايەل جەدەل جاردەم كولىگىندە ءسابيىن دۇنيەگە اكەلدى.
ەۋروپادا ۇيدە بوسانۋ – جاڭا ادامدى قارسى الۋ
ەلىمىزدە بالانى اۋرۋحانادان تىس جەردە ومىرگە اكەلۋگە زاڭ جۇزىندە شەكتەۋ قويىلماعان.
الەم ەلدەرىنە كوز جۇگىرتەر بولساق، فرانتسيادا ۇيدە بوسانۋعا تولىعىمەن تىيىم سالىنعان. ال،ۇلىبريتانيا، اۆستريا، دانيا، نيدەرلاندى مەملەكەتتەرىندە رۇقسات ەتىلگەن جانە بۇعان قالىپتى جاعداي رەتىندە قارايدى.
وزگە ەلدەرمەن سالىستىرعاندا نيدەرلاندى دا ايەلدەردىڭ ۇيدە بوسانۋ جاعدايلارى ءجيى تىركەلەدى. ماسەلەن، جىلىنا اعىلشىنداردىڭ اراسىندا شامامەن 2,7 پايىز ادام ءۇي جاعدايىندا بوسانۋدى تاڭداسا، نيدەرلاندىدا جىلىنا تۋىلاتىن 180 مىڭعا جۋىق ءسابيدىڭ 13 پايىزى ءۇي جاعدايىندا دۇنيەگە كەلەدى. ءتىپتى نيدەرلاندى دا بۇل ۇيرەنشىكتى جاعدايعا اينالعانى سونشالىقتى – جۇكتىلىكتىڭ جەتىنشى ايىنداعى ءاربىر ايەلگە مەملەكەت تاراپىنان بوسانۋعا قاجەتتى زاتتارى بار قوراپ بەرىلەدى. گوللانديالىق ايەلدەر جۇكتىلىككە اۋرۋحاناعا بارۋدى قاجەت ەتەتىن اۋرۋ ەمەس، تابيعي پروتسەسس رەتىندە قارايدى. ولار ۇيدە بوسانۋ – وتباسىنىڭ جاڭا مۇشەسىن قارسى الۋدىڭ ءتيىمدى جولى دەپ ساناعاندىقتان ەۋروپا ەلدەرىنىڭ اراسىندا ەڭ جوعارى كورسەتكىشكە يە.
قازاقستاندا كەزدەيسوق بوسانۋ – بالاعا قاتەر
قازاقستانداعى جاعداي باسقاشا. مۇندا جۇكتى انالار دەنساۋلىعىن ۇدايى تەكسەرىپ، ۇيدە بوسانۋعا بولادى دەپ ەشكىم ارنايى دارىگەرلىك قوراپ بەرمەيدى. اسىرەسە، الىس اۋىلدارداعى جاعدايدىڭ قانداي ەكەنىن ايتۋدىڭ ءوزى قيىن. ءارى-بەرىدەن سوڭ اياعى اۋىر ايەلدەردىڭ ۋاقتىلى دارىگەرگە قارالۋى دا كۇمان تۋدىرادى.
دارىگەرلەردىڭ ايتۋىنشا، ەلىمىزدەگى اۋرۋحانادان تىس جەردە سابيلەردىڭ دۇنيەگە كەلۋىنە انالاردىڭ بوسانۋ جايلى، تولعاق تۋرالى اقپاراتتاردى بىلمەۋى دە تۇرتكى بولادى.
- جۇكتىلىك جايلى قازاق تىلىندە اقپاراتتاردىڭ از بولۋى دا بۇعان سەبەپ بولىپ وتىر. ءاربىر ايەل بالاسىنا، بولاشاق اناعا، جۇكتى ايەلدەرگە الدىن-الا اقپارات تولىق بەرىلسە، ياعني، تولعاق جاقىنداعاندا ۇيدە جۇرە بەرۋ بالا مەن انا ومىرىنە قاۋىپتى ەكەنىن ەسكەرتسە، قاتەر ازايادى دەپ ويلايمىن، - دەيدى، اكۋشەر-گينەكولوگ سىمبات نۇرقوجاقىزى.
بالا ءولىمى اۋرۋحانادا دۇنيەگە اكەلگەنگە قاراعاندا ءۇي جاعدايىندا بوسانۋ كەزىندە 3 ەسە ءجيى كەزدەسەدى.
- ۇيدە قاۋىپ وتە كوپ. ءولىم كورسەتكىشى ارتادى. ماسەلەن، ۇيدە بەلسەندى تولعاعى باستالعان ايەلدى كۇيەۋى بوساندىرامىن دەپ، ءسابيدى قۇلاتىپ الىپ، بالا شەتىنەپ كەتكەن جاعدايلاردى دا ەستىدىك. سول سەبەپتى جۇكتى ايەلدەرگە پەرزەنتحاناعا بارۋعا كەڭەس بەرەمىن، - دەيدى اكۋشەر-گينەكولوگ.
مەرەي مىرزاعاليقىزى
«ادىرنا» ۇلتتىق پورتالى
