الەۋمەتتىك جەلىدە قازاق ۇيدە جارتىلاي جالاڭاش بيلەگەن جىگىت پەن ەكى قىزدىڭ بەينەسى كوپتىڭ اشۋىنا ءتيىپ، قوعامدىق رەزونانس تۋدىرعان بولاتىن. جاستاردىڭ قالاي جازالاناتىنى تۋرالى ۇلتتىق قاۋىپسىزدىك كوميتەتى مەن باس پروكۋراتۋرا مالىمدەمە جاسادى، دەپ حابارلايدى “ادىرنا” ۇلتتىق پورتالى.
كيىز ۇيدە وكشەلى اياق كيىم مەن اشىق كيىنگەندەردى جازالاۋ تۋرالى سامات مۇساباەۆ قۇزىرلى ورگانعا ءوتىنىش جولداعان.
بەينەنىڭ الماتى وبلىسىنىڭ قاراساي اۋدانىندا تۇسىرىلگەنى انىقتالدى.
“2024 جىلى 1 شىلدەدە قاراساي اۋداندىق پوليتسيا باسقارماسى قر قك 174-بابىنىڭ 1-بولىگى بويىنشا "الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرۋ" بويىنشا سوتقا دەيىنگى تەرگەۋدى باستادى", - دەپ حابارلادى باس پروكۋرور بەرىك اسىلوۆ.
اتالعان باپ بويىنشا ەگەر كۇدىكتىلەردىڭ كىناسى دالەلدەنسە ولارعا جەتى جىلعا دەيىن باس بوستاندىعىنان ايىرىلۋ جازاسى كوزدەلگەن. الايدا ۇلتتىق قاۋىپسىزدىك كوميتەتىنىڭ حابارلاۋىنشا، جارتىلاي جالاڭاشتانعان بيشىلەردىڭ نيەتىن ءبىر بەينە ارقىلى انىقتاۋ مۇمكىن ەمەس ەكەن.
