مەكتەپ تۇلەكتەرى اراسىندا تەستىلەۋدەن 6 جىلدان سوڭ رەكورد جاڭارتىپ ماكسيمالدى 140 بالل يەسى بولعان جاننۇر ەڭسەبەك ءوزىنىڭ ءومىر سالتى، ءحوببيى جانە ازىرلىك بارىسىنداعى ءىس-تاجىريبەسىمەن بولىسەدى.
ۇلتتىق ءبىرىڭعاي تەستىلەۋ ورتالىعىنىڭ مالىمەتىنشە 2024 جىلعى جالعىز رەكورد ورناتقان وقۋشى – جاننۇر ەڭسەبەك. ول الماتى وبلىسى قارابۇلاق اۋىلىنىڭ №22 ورتا مەكتەبىن التىن بەلگىمەن بىتىرگەن. رەكوردسمەن تۇلەك «ادىرنا» تىلشىسىنە 140 باللدىڭ قۇپياسى جايلى ايتىپ بەردى.
«ەشقانداي قۇرباندىققا بارمادىم»
- ۇبت-دان سوڭ ءومىرىڭ قالاي وزگەردى، ادامدار تاني باستادى ما؟ ىشكى سەزىمدەرىڭمەن بولىسسەڭ؟
- بارلىق ورتا، ادامدار، دوستارىم، سىنىپتاستارىم شۋلاپ وسى جاڭالىقتى ايتىپ تاۋىسا الماي جاتىر. بارلىعى ەموتسيااڭدى كورسەتپەيسىڭ دەپ ايتادى. بىراق مەن ءبىر اپتا بويى قۋانىشتان جارىلىپ، توبەم كوككە ءبىر ەلى جەتپەي ءجۇردى، تەك سول ءساتتەر ۆيدەوعا تۇسپەي قالعانى بولماسا.
تەست تاپسىرىپ ۇيگە كەلگەندە اتا-انام، سىنىپتاستارىم كۇتىپ العاندا تاڭعالدىم. ءتىپتى كوشەدە جۇرگەن ساتتە كەيبىر ادامدار تانىپ، «سەن 140 بالل العان بالا ەمەسسىڭ بە» دەپ جاتادى. دوستارىم، جاقىندارىما نەگىزى ۇبت-نى 27-ءسى ەمەس, 28-ءى تاپسىرامىن دەپ ايتقان بولاتىنمىن.
- 140 بالل الاتىنىڭا سەنىمدى بولدىڭ با؟ الدە قورىقتىڭ با؟ ساعان ماقساتقا جەتۋگە نە شابىت بەردى؟
- باسىندا قورىقتىم. سەبەبى ءبىرىنشى ۇبت-دان 132 بالل الدىم. سوندا دا قورقىنىش بولعان, ەندى ودان جوعارى الا المايمىن دەدىم. سەنىم ءوشتى. ءتىپتى الدىڭعى ۇبت-دان سوڭ ءبىر اپتا بويى دايىندىعىمدى توقتاتىپ تاستادىم.
سودان كەيىن كۋراتورلارىم «سەنەن 140 بالل يەگەرى شىعادى» دەگەن سەنىم، قولداۋ بءىلدىردى. ودان سوڭ، Hyuindai Sonato اۆتوكولىگى ماعان شابىت بەردءى. ناۋرىز ايىنان باستاپ كولىكتى الۋىم كەرەك دەگەن ماقسات قويدىم .
كۋراتورلارىمنىڭ بەرگەن قولداۋى كوپ كومەگىن تيگىزدى. ەكى تەستىڭ اراسى ءبىر اي بولدى. ءبىرىنشى تەستتى تاپسىرىپ، ءبىر اپتا دەمالىستان سوڭ دايىندىعىمدى قايتادان باستادىم.
- مۇنداي جەتىستءىكتىڭ قۇپياسى نەدە؟ ناتيجەگە جەتۋ ءۇشىن قانداي ادەتتەردەن باس تارتتىڭ، نەنى قۇربان ەتتىڭ؟
- ەشقانداي. دوستارىممەن اراسىندا ويناۋعا دا شىعىپ تۇردىم، الەۋمەتتىك جەلىلەردى دە وشىرگەن جوقپىن. اراسىندا جاڭالىقتاردى كورۋگە كىرىپ تۇراتىنمىن. تەك ساباقتى عانا ويلاپ, باسقا دۇنيەلەردى ۇمىتۋعا بولمايدى دەپ ويلايمىن. باستىسى – فوكۋستى جوعالتىپ الماۋ كەرەك.
«GOOGLE» سەكىلدى كومپانيادا جۇمىس جاساعىم كەلەدى»
- بولاشاقتا شەتەلدە وقۋ ويىڭدا بار ما؟ الداعى 5 جىلىڭدى قالاي ەلەستەسىڭ؟
- شەتەلدە وقۋ ازىرگە جوسپارىمدا جوق. بىراق ءتاجءىريبە الماسۋعا، جۇمىس جاساۋعا بارعىم كەلەدى. الداعى 5 جىلىمدا SDU ۋنيۆەرسيتەتىن اياقتايمىن. ەگەر بارلىعى جاقسى بولىپ جاتسا، «Google» سەكىلدى كومپانيالاردا جۇمىس جاساعىم كەلەدى. ۇلكەن كومپانيالاردا جۇمىس جاساپ، باعىمدى سىناپ كورسەم دەيمىن.
- ۇيىڭدە قانشا اعايىندىسىڭدار؟ بايقاۋىمشا اتا-اناڭا جاقىنسىڭ. الماتى سەكىلدى ۇلكەن قالاعا كوشۋ ويىڭدا بار ما؟
- ۇيدە مەن جانە قارىنداسىم. ءيا، اتا-اناما جاقىنمىن. بارلىق دۇنيەنى اتا-اناممەن اقىلداسا وتىرىپ شەشەمىن. ۇلكەن قالاعا كوشۋ جايلى ايتار بولسام، ءازىرشە تەك پاتەر جالعا الىپ الماتىعا كوشەمىن، قالعانىن بولاشاقتا كورە جاتىرمىز.
- قازاقستاننىڭ دامۋىنا، ءوز ماماندىعىڭ بويىنشا IT سالاسىن دامىتىپ، جەكە كومپانيا اشۋ ويىڭدا بار ما؟
- ويىمدا بار, بىراق يدەيا جوق. بىزگە دەيىن بارلىعى ويلاپ تابىلعان، بارلىعى جاسالىپ قويىلعان سياقتى كورىنەدى ازىرگە. الداعى ۋاقىتتا ەلءىمىزدىڭ دامۋىنا ۇلەس قوسۋ ويىمدا بار. مىقتى كومپانيالاردا IT سالاسى بويىنشا جۇمىس جاساپ، ءتاجىريبە الماسقىم كەلەدى.
«اقش ەلىندە جۇمىس جاساپ كورگىم كەلەدى»
- قانداي مەملەكەتتەردە ساياحاتتاعىڭ كەلەدى؟ ماگيستراتۋرانى شەتەلدە وقۋ ويىڭدا بار ما؟
- اقش ەلىنە بارعىم كەلەدى. بىراق ول جاققا بارۋ مۇمكىن بە دەپ ويلايمىن. اقش-تا جۇمىس جاساپ كورگىم كەلەدى. ماگيستراتۋرانى شەتەلدە وقۋ جايلى ءالى ويلانبادىم. ەۋروپا ەلدەرىنە ءالى قىزىعىپ كورمەدىم.
- حوببيىڭ بار ما؟ كىتاپ وقيسىڭ با، قانداي جانرداعى كىتاپتاردى وقيسىڭ؟ كوپ ارمانداپ، قييالدايسىڭ با؟ ارمان-ماقساتتارىڭدى جازاسىڭ با؟
- حوببيىم – شاحمات. شاحمات ويىنى بويىنشا رەيتينگىم وتە جوعارى. ودان بولەك جاقىن ارادا ۇستەل تەننيسىن ويناپ باستادىم. ەشقانداي كىتاپ وقىمايمىن، وقىپ تا كورمەپپىن. وسى ۋاقىتقا دەيىن ءبىر قىزىعى – كىتاپ وقىپ كورمەپپىن... ارماندايمىن بىراق ولاردى جازبايمىن، تەك ىشتە ساقتاپ جۇرەمىن...
- باعاڭا كۇماندانىپ، ۇلتتىق تەستىلەۋ ورتالىعى قايتادان جازبالاردى تەكسەرەمىز دەپ ايتقان جوق پا? ساتىپ العان دەگەن الىپ-قاشپا اڭگىمەلەر ايتىلىپ قالىپ جۇرگەن جوق پا؟
- ۇلتتىق تەستىلەۋ ورتالىعى 140 بالل يەگەرى دەپ رەسمي تۇردە جاريالاپ پاراقشالارىنا سالىپ قويعان. جازبا استىندا ەگەر كۇمان تۋدىراتىن ءىس-ارەكەتتەر بايقالسا, 31 قازانعا دەيىن جازبالار قايتا قارالادى. ۋاقىتى جەتكەندە جازبالار جويىلادى دەگەن. ال مەن تەست تاپسىرعان مەكەن-جاي بويىنشا اۋديتورياداعى ورتاق كامەرالار جۇمىس جاسامايدى ەكەن.
قۇپيا سىرى. «از-ازدان ۇزدىكسىز دايىندالۋ»
- سونىمەن, ناقتى ايتار بولساق بۇل 140 باللعا جەتۋدىڭ قۇپياسى سىرى نەدە؟ قانداي فيشكاڭ بار؟
- 140 باللدىڭ قۇپياسى - «از-ازدان ۇزدىكسىز دايىندالۋ». تەك تۇراقتى 2 جىل بويى جاسالىنعان دايىندىق جانە باستىسى سەنىم بولدى. كۋرستا بەرىلگەن تاپسىرمالداردى ءبىردەن ورىنداپ وتىردىم. باستاپقى ۋاقىتتا جۇيەلى دايىندىق بولمادى، ءىس-ارەكەتتەرىم كەرى كەتىپ، دايىندالعىم كەلمەيتىن ساتتەر بولدى.
كەيىن اقپان ايىنان باستاپ ايلىق، اپتالىق جوسپار قۇرىپ, رەتكە كەلتىرە باستادىم. دايىندىعىمدى قايتادان قولىما الدىم. قيىندىق تۋدىرعان كەيبىر پاندەر بولدى.
اتاپ ايتسام، قازاقستان تاريحى ءپانى. دايىندىعىمدى 11 سىنىپتان ءدال سول پاننەن كەش باستادىم. ماعان كۇن، جىلدار جاتتاعان قيىندىق تۋدىرادى.
تەست تاپسىرۋ بارىسىندا بەرىلگەن 4 ساعاتتىڭ 2 ساعاتىندا بارلىق تاپسىرمانى اياقتاپ، 90 مينۋتىن قايتا تەكسەرىپ قاراپ شىعۋعا ارنادىم.
ماعان ارتىلعان سەنىم جانە قايتسەم دە اۆتوكولءىكتى الۋىم قاجەت دەگەن ماقسات كوكەيىمدە تۇردى. تەك وقىپ قانا قويمادىم. ويلاۋ جۇيەممەن وزىمنىڭ سول باللدى الامىن, قولىمنان كەلەدى، مەن جاسايمىن دەگەن ۇستانىم, ماقساتپەن جۇمىس جاسادىم. ماقساتىما جەتىپ كوزىمە جاس كەلدى. بارلىق ەموتسيا تەك اۆتوكولىكتى الۋ بارىسىندا شىقتى. سول ساتتە ءوزىمنىڭ ماقساتقا تولىقتاي جەتكەنىمە، ارمانىمنىڭ ورىندالعانىنا كوز جەتكىزدىم.
- كەلەر جىلى ۇبت تاپسىراتىن تالاپكەرلەرگە قانداي كەڭەس ايتاسىڭ؟ نەدەن باستاعانى دۇرىس؟
- اتاپ وتەتىن جايت – دايىندىقتى ەرتە باستاعان دۇرىس. بازالىق ءبىلىمدى مەكتەپ قابىرعاسىنان باستاپ جاقسى جەتىلدىرۋ قاجەت. دايىندىقتى توقتاتپاي، از-ازدان ۇزدىكسىز دەگەن ۇستانىمدى بەرىك ۇستانۋ قاجەت. باستىسى وزىڭە، ناتيجەگە، ماقساتىڭا دەگەن سەنىم.
- سۇحبات بەرگەنىڭە راحمەت!
فاريزا نۇربولاتقىزى
