الماتىدا بەيبىت شەرۋلەر مەن جينالىستاردى ۇيىمداستىرۋ جانە وتكىزۋ ءۇشىن بەلگىلەنگەن ارنايى ورىن وزگەرۋى مۇمكىن، دەپ حابارلايدى "ادىرنا" ۇلتتىق پورتالى قازاقپاراتقا سىلتەمە جاساپ.
بۇل تۋرالى اشىق نقا سايتىندا جاريالاندى. وندا الماتى قالاسى ءماسليحاتىنىڭ «الماتى قالاسىنداعى بەيبىت جينالىستاردى ۇيىمداستىرۋ جانە وتكىزۋ ءۇشىن ارنايى ورىنداردى، سونداي-اق ارنايى ورىنداردى پايدالانۋ ءتارتىبىن ايقىنداۋ تۋرالى» 2020 جىلعى 23 ماۋسىمداعى №462 شەشىمىنە وزگەرىس ەنگىزۋ تۋرالى ۇسىنىس ورنالاستىرىلعاان.
شەرۋلەر ورنىن وزگەرتۋگە قاتىستى جوبا 24 شىلدەگە دەيىن اشىق نقا سايتىندا اشىق تالقىلاۋدا بولادى.
بۇعان دەيىن بەيبىت شەرۋلەردى وتكىزۋگە ارنالعان ورىن رەتىندە بەلگىلەنگەن شوقان ءۋاليحانوۆ اتىنداعى سكۆەر بولاتىن. بۇل سكۆەر 1000 ادامعا ارنالعان. ۇسىنىس بويىنشا بەيبىت شەرۋدى ۇيىمداستىرۋ ورنىن امانگەلدى يمانوۆ اتىنداعى سكۆەرگە كوشىرۋ ۇسىنىلۋدا. مۇندا 500 ادام جينالا الادى.
شەۆچەنكو كوشەسىمەن وتەتىن قولدانىستاعى شەرۋ مارشرۋتى گاگارين داڭعىلى مەن مۇقانوۆ كوشەسى اراسىنداعى جامبىل كوشەسىنىڭ بويىنداعى جاڭا مارشرۋتقا اۋىستىرىلادى.
