پرەزيدەنت قاسىم-جومارت توقاەۆ ويىن بيزنەسى، لوتەرەيا قىزمەتى جانە لۋدومانياعا قاتىستى زاڭ جوباسىنا قول قويدى. بۇل تۋرالى اقوردا مالىمدەدى، دەپ حابارلايدى “ادىرنا” ۇلتتىق پورتالى.
«مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيا قىزمەتى، دەنساۋلىق ساقتاۋ، مەملەكەتتىك ەڭبەك ينسپەكتسياسى، مەملەكەتتىك باقىلاۋ جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى»، – دەلىنگەن اقوردا حابارلاماسىندا.
اقپاراتقا سۇيەنسەك، زاڭ ارقىلى حالىقتىڭ ويىنعا تاۋەلدىلىگىن تومەندەتۋگە باعىتتالعان شەكتەۋشى جانە ىنتالاندىرۋشى نورمالار ەنگىزىلگەن.
اتاپ ايتقاندا، قۇمار ويىندارعا/باس تىگۋگە قاتىسۋىنا تىيىم سالىناتىن ادامدار ساناتىنىڭ ءتىزىمى كەڭەيتىلدى. ەندى ولاردىڭ قاتارىنا بورىشكەرلەردىڭ بىرىڭعاي تىزىلىمىندە تۇرعان تۇلعالار قوسىلدى. سونىمەن قاتار سىبايلاس جەمقورلىققا قارسى شەكتەۋ ەنگىزۋ ارقىلى جاۋاپتى مەملەكەتتىك لاۋازىمدى اتقاراتىن، مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن ادامداردىڭ، ولارعا تەڭەستىرىلگەن ادامداردىڭ قۇمار ويىندارعا/باس تىگۋگە قاتىسۋىنا شەكتەۋ قويىلادى.
«بۇدان بىلاي مەملەكەتتىك قىزمەتشىلەر، اسكەري قىزمەتشىلەر، ارنايى جانە قۇقىق قورعاۋ ورگاندارىنىڭ قىزمەتكەرلەرى، بيۋدجەتتىك ۇيىمداردىڭ باسشىلارى قۇمار ويىندارعا/باس تىگۋگە قاتىسا المايدى. بۇل شەكتەۋدى ساقتاماعانى ءۇشىن ولاردى جۇمىستان شىعارۋ شاراسى قاراستىرىلعان. ويىن بيزنەسىن ۇيىمداستىرۋشىلاردىڭ قىزمەتىن رەتتەۋ تەتىكتەرى كۇشەيتىلدى»، – دەلىنگەن حابارلامادا.
تۋريزم جانە سپورت مينيسترلىگى ويىن مەكەمەسىنىڭ، بۋكمەكەرلىك كەڭسەنىڭ، توتاليزاتوردىڭ، ستاۆكالاردى قابىلداۋ جانە قۇمار ءويىنداردىڭ/باس تىگۋدىڭ بىرىڭعاي ەرەجەلەرىن بەكىتەدى.
بۇعان قوسا، بۋكمەكەرلىك كەڭسەلەر مەن توتاليزاتورلاردىڭ جارنامالارىنا شەكتەۋ قويىلدى. اتاپ ايتقاندا، بۋكمەكەرلىك كەڭسەلەر مەن توتاليزاتورلاردى سىرتقى (كورنەكى) جارناماسىنا، سونداي-اق ولاردىڭ قىزمەتىن كولىك قۇرالدارىندا، بۇقارالىق اقپارات قۇرالدارىندا، كينو -, ۆيدەو-جانە انىقتامالىق قىزمەت كورسەتۋ ورىندارىندا جارنامالاۋعا تىيىم سالىنادى.
تەك بۋكمەكەرلىك كەڭسە نەمەسە توتاليزاتور ورنالاسقان جەردەگى سىرتقى جارناماعا; سپورت عيماراتتارىنىڭ ىشىندە جانە سپورتشىلاردىڭ كيىمىندە; سپورتتىق تاقىرىپقا ماماندانعان جانە رەسمي تىركەلگەن باق-تا، سونداي-اق وتاندىق تەلەارنالار حالىقارالىق سپورتتىق جارىستاردى تىكەلەي ترانسلياتسيا جاساعان كەزدە جارنامالاۋعا رۇقسات ەتىلەدى.
سونىمەن قاتار، لوتەرەيا قىزمەتىن رەتتەۋ تەتىكتەرى جاڭارتىلدى. ناقتىراق ايتقاندا، تۇرعىن ۇيلەردە، جاتاقحانالاردا، عيبادات ۇيلەرىندە، مادەنيەت ۇيىمدارىنىڭ عيماراتتارى مەن قۇرىلىستارىندا، الەۋمەتتىك وبەكتىلەردە، سونداي-اق، ولاردان ءجۇز مەتر قاشىقتىقتاعى راديۋستا لوتەرەيا بيلەتتەرىن تاراتۋعا جانە لوتەرەيا تەرمينالدارىن ورناتۋعا تىيىم سالىنادى. وسكەلەڭ ۇرپاقتىڭ دەنساۋلىعىن ەنەرگەتيكالىق سۋسىنداردىڭ زياندى سالدارىنان قورعاۋ ءۇشىن مۇنداي سۋسىنداردى 21 جاسقا دەيىنگى ادامدارعا ساتۋعا تىيىم سالىنادى.
