جاقىندا حالىقارالىق بوكس قاۋىمداستىعىنا (IBA) مۇشە ۇلتتىق سپورت فەدەراتسيالارىنىڭ اتىنان شىققان بوكسشىلار 2028 جىلى لوس-اندجەلەستە وتەتىن وليمپيادا ويىندارىنا قاتىسۋعا جىبەرىلمەيدى. وسىعان قاتىستى كەشە، 7 شىلدەدە قازاقستان وليمپيادا كوميتەتىنىڭ جاڭا باسشىسى گەننادي گولوۆكين مالىمدەمە جاسادى، دەپ حابارلايدى “ادىرنا” ۇلتتىق پورتالى.
ول Reuters تىلشىسىنە بەرگەن سۇحباتىندا قازاقستان بوكس فەدەراتسياسىنىڭ باسشىلىعىنا حالىقارالىق بوكس قاۋىمداستىعىنان (IBA) شىعۋ كەرەگىن ايتقان.
«ءبىز ءوز تاراپىمىزدان قازاقستان بوكس فەدەراتسياسىن World Boxing ۇيىمىنا كىرۋگە ۇگىتتەيمىز، ول ءۇشىن قولدان كەلگەننىڭ ءبارىن جاسايمىز. الايدا قبف-نىڭ تاڭداۋ قۇقىعى بار. شەشىمدى وزدەرى قابىلدايدى. قۇقىقتىق تۇرعىدان مەن ولارعا قىسىم كورسەتە المايمىن»، - دەدى گەننادي گولوۆكين.
1bol.kz سايتىنىڭ مالىمەتىنشە، بۇعان دەيىن فەدەراتسيانى باسقارعان كەڭەس راقىشەۆتىڭ IBA-دان شىعىپ كەتۋگە ەرىك-جىگەرى جەتە قويعان جوق. ال جاڭا باسشى شاحمۇرات ءمۇتالىپتىڭ سىنالاتىن تۇسى وسى بولىپ تۇر. ويتكەنى حوك حالىقارالىق بوكس قاۋىمداستىعىنا (IBA) مۇشە ۇلتتىق سپورت فەدەراتسيالارىنىڭ اتىنان شىققان بوكسشىلار 2028 جىلى لوس-اندجەلەستە وتەتىن وليمپيادا ويىندارىنا قاتىسۋعا جىبەرىلمەيتىنىن مالىمدەگەنى بار. ەندى «اربانى دا سىندىرماي، وگىزدى دە ولتىرمەي» شەشىم قابىلداۋ جاڭا مەنەدجەرگە بايلانىستى.
«حالىقارالىق وليمپيادا كوميتەتى رەسەيلىك ۋمار كرەملەۆ باسقاراتىن IBA-نىڭ قارجىلىق ەسەبىنە سەنبەيدى. وتە ۇلكەن كۇمانمەن قاراپ وتىر. كرەملەۆ باسشىلىققا كەلگەنى ۇيىم بوكسشىلار كولەمدى سىياقىنى وڭدى-سولدى تاراتاتىن بولعان. ەندى پاريج وليمپياداسىندا چەمپيون اتانعان جانە جۇلدەگەر بولعان بوكسشىلارعا 3,1 ميلليون دوللار جۇلدە قورىن قاراستىرعانىن مالىمدەگەن. بۇل قارجى 100-دەن استام بوكسشىعا بولىنەدى”، دەلىنگەن باسىلىم جازباسىندا.
بۇگىندە World Boxing ۇيىمىنا اۋستراليا، ارگەنتينا، باربادوس، برازيليا، ۇلىبريتانيا، گەرمانيا، گوندۋراس، دانيا، دومينيكا رەسپۋبليكاسى، كانادا، موڭعوليا، نيدەرلاند، جاڭا زەلانديا، پاناما، پەرۋ، سينگاپۋر، اقش، فرانتسيالىق پولينەزيا جانە شۆەتسيا كىرەدى.
ازىرگە بوكس دەرجاۆاسى سانالاتىن وزبەكستان، كۋبا سياقتى ەلدەر ءوز تاڭداۋىن جاساعان جوق.
