دومبىرادا شەبەر ويناپ، قازاقتى الەمگە تانىتىپ جۇرگەن كۇيشى اسىلبەك ەڭسەپوۆ الەۋمەتتىك جەلىدەگى پاراقشاسىندا ەرەكشە جازبا جاريالادى. ول بارشا حالىقتى ۇلتتىق دومبىرا كۇنىمەن قۇتتىقتادى.
"دومبىرا – قاتتىلىق پەن جۇمساقتىق ۇيلەسىمى. دومبىرانىڭ ەكى ىشەگى - ەجەلگى زامان مەن وسى زاماننىڭ سىرىن شەرتەدى! دومبىرانىڭ ءۇنى - قايشىلاسقان الەمنىڭ - جاۋىزدىق پەن مەيىرىم، سوعىس پەن بەيبىتشىلىك، سۇرەڭسىزدىك پەن سۇلۋلىق اراسىن جالعايتىن ۇيلەسىم» دەپ ريم پاپاسىنىڭ ءوزى سىر شەرتكەنىندەي… «قاستەرلى اسپاپ دالا وركەنيەتىنىڭ اجىراماس بولىگىنە اينالدى. ءتول مادەنيەتىمىزدىڭ قۇندى قازىناسىن ساقتاۋ – بارشامىزدىڭ پارىزىمىز. دومبىرا توردەن تۇسپەسىن» - دەپ ءوزىڭىز ايقىنداپ ايتقانىڭىزداي – دومبىرا مەن قازاق ەگىز ۇعىم", - دەپ جازدى ول.
جەلىگە ەرەكشە سۋرەتتەر مەن عيماراتتىڭ ماكەتىن جاريالاعان اسىلبەك ەڭسەپوۆ پرەزيدەنتتەن "ۇلتتىق دومبىرا ورتالىعىنىڭ اشىلۋىنا قولداۋ ءبىلدىرۋىن ءوتىندى.
"قۇرمەتتى قاسىم-جومارت كەمەل ۇلى!
ءسىزدىڭ ۇلتتىق ونەرگە دەگەن زور قامقورلىعىڭىز بەن ەرەكشە كوزقاراسىڭىزدى ەسكەرە وتىرىپ، ەلىمىزدىڭ تورىندە، ەل ورداسى استانا قالاسىنان ءبىز ۇسىنعان جوبا بويىنشا «ۇلتتىق دومبىرا ورتالىعىنىڭ» عيماراتى سالىنىپ، ونىڭ سالتاناتتى تۇردە اشىلۋىنا ءبىر ءوزىڭىزدىڭ باستاۋ بولىپ، قولداۋ ءبىلدىرۋىڭىزدى سۇرايمىن. اسىلبەك ەڭسەپوۆ", - دەلىنگەن ونەر يەسىنىڭ جازباسىندا.
