بەلگىلى ءانشى قايرات نۇرتاستىڭ اناسى، پروديۋسەرى گۇلزيرا ايداربەكوۆا سوڭعى جاعدايلارعا قاتىستى پىكىر ءبىلدىردى، دەپ حابارلايدى “ادىرنا” ۇلتتىق پورتالى.
پروديۋسەر گۇلزيرا ايداربەكوۆا جەلىدەگى جازباسىندا ءانشى قايرات نۇرتاستىڭ قاماۋعا الىنعانىنان كەيىن ءوزىنىڭ قانداي كۇيدە بولعانىن جازدى.
"تۇسكە دەيىن "اناسى قانداي كۇيدە" دەپ مازالاۋعا ىڭعايسىزدىق تانىتىپ، سىزدەردىڭ دە جۇرەكتەرىڭىز تىنىم بەرمەي، ءتۇس اۋا قوڭىراۋلار مەن سمستەر ەش توقتاعان جوق. ءيا، جۋرناليستەرگە دە حايپ تابىلىپ، ءبىرى "ساۋاپ بولدى" دەپ كۇلكىگە قارىق بولىپ، جاندارى راحاتتانىپ ويلارىنا كەلگەنىن جازسا، 90 پايىز حالىق جاناشىرلىقپەن جۇرەكتەرى جىلاپ جاتتى. العاشىندا "تۇننەن امان شىعام با، جوق پا" دەدىم راس، قۇر سۇلدەم قالعانداي، جانارىم ءبىر نۇكتەگە قادالىپ، ۇزاق وتىردىم، ءىشىم ورتەندى، كۇيدىم-جاندىم، راس. جولداسىمنىڭ، بالا-شاعا، اعايىن، دوستارىمنىڭ ۋايىمى ۇلىمنان بۇرىن مەن بولعانىمدى دا سەزىندىم. بولماعان سوڭ نۇرەكەڭ تەلەفون سوعىپ ۇرىسا باستادى: "ەلدىڭ بالالارىندا وداندا اۋىر سىناق بولىپ جاتقاندارى بار، ەر ازامات بولعان سوڭ باسىنان ءبارى وتەدى، ەڭسەڭدى كوتەر، سەن مىقتى بولۋىڭ كەرەك" دەپ. قازىر ءبارىن ويلاپ، ويىم جان-جاققا شاشىراڭقى بولىپ تۇرعانى راس. سوندا دا بولسا، ۇلىمنىڭ سوت پروتسەسى باستالىسىمەن كومەكشىسىنە قاراپ، "مامام جىلاماسىنشى" دەپ ىمداپ ءتۇسىندىرىپ جاتقانىن كورىپ، كوزىمنىڭ جاسىنا ەرىك بەردىم، بىراق ۇلىما كورسەتپەدىم", - دەدى پروديۋسەر ايداربەكوۆا.
گۇلزيرا ايداربەكوۆا ءانشى قايراتتى سوتقا بەرگەن ءوزىنىڭ جاقىن دوسى ەكەنىن دە جايىپ سالدى.
"جانىنا جاقىن ۇستاپ، ۇستىندەگى كيىمدەرىنە دەيىن شەشىپ بەرىپ، قيماس دۇنيەسى مەن اقشاسىنا دەيىن ءبولىسىپ، باۋىرىم دەپ جاقىن تۇتىپ جۇرگەن دوسى، ءبىر ساتتە جاۋىنا اينالادى دەپ كىم ويلاعان. "مەنىڭ دە كورگەنىم كوپ بالام، بارىنە اق جۇرەگىڭمەن سەنىم ارتىپ، جانىڭا جيناپ، ۇيگە الىپ كەلە بەرمەشى" دەپ ايتقان كەزدەرىم دە جوق ەمەس، ونىڭ ۇستىنە كوپ نارسەنىڭ قۇربانى بولۋعا ەل الدىندا جۇرگەنىنىڭ دە اسەرى تيەرىن انا جۇرەگىم سەزبەيدى ەمەس. ۇلىما بار تىلەرىم: ساعى سىنباي، جۇزىندە مۇڭ بولماي، اللا اماندىق پەن سابىر بەرسىن! ال سىزدەرگە تىلەرىم: ەشبىر انانى قۇداي بالاسىمەن سىناماسىن", - دەدى ءانشىنىڭ اناسى.
