قازاقستاندا تاعى ءبىر تانىمال ءانشى قاماۋعا الىندى، - دەپ حابارلايدى “ادىرنا” ۇلتتىق پورتالى.
جەلىدە قازاقستاندىق ءانشى ءابدىجاپپار القوجانىڭ قوناەۆتا پوليتسيا قىزمەتكەرلەرىنە باعىنباعانى ءۇشىن ۇستالعانى تۋرالى اقپارات پايدا بولدى.
الماتى وبلىسىنىڭ پوليتسيا دەپارتامەنتى تولىق مالىمەت بەردى. وقيعا 6 شىلدە كۇنى بولدى. پوليتسيا قىزمەتكەرلەرى Toyota Camry كولىگىن توقتاتقان. تەكسەرۋ بارىسىندا اتالعان كولىكتىڭ جۇرگىزۋشىسى كولىك قۇرالىن باسقارۋ قۇقىعىنسىز رولدە وتىرعانىن انىقتادى.
ءابدىجاپپار القوجانىڭ ءوزى باسقا KIA Carnival كولىگىندە جولاۋشى رەتىندە وتىرعان. ول سول ساتتە ءتارتىپ ساقشىلارىنا قىسىم كورسەتىپ، قۇقىق بۇزۋشىنى تىركەۋگە كەدەرگى كەلتىرە باستاعانى ايتىلعان. سونىمەن قاتار، پوليتسەيلەردىڭ ايتۋىنشا، ءانشى ماس بولعان.
«الايدا، كولىك ايىپپۇل تۇراعىنا جەتكىزىلگەن كەزدە جولاۋشىسى ازامات م. پوليتسيا قىزمەتكەرلەرىنە زاڭسىز قىسىم كورسەتىپ، قۇقىق بۇزۋشىنى تىركەۋگە كەدەرگى جاساي باستاعان. قۇقىق بۇزۋشى پوليتسيا قىزمەتكەرلەرىنە باعىنباعاندىقتان مەديتسينالىق تەكسەرۋگە جىبەرىلدى، ونىڭ قورىتىندىسى بويىنشا «ورتاشا» الكوگولدىك ماس كۇيى انىقتالدى»، - دەپ حابارلادى الماتى وبلىسىنىڭ پوليتسيا دەپارتامەنتى.
ناتيجەسىندە، كولىك قۇرالىن باسقارۋ قۇقىعىنان ايىرىلعان كۇيدە باسقارعانى ءۇشىن «تويوتا كامري» كولىگىنىڭ جۇرگىزۋشىسى 10 تاۋلىككە اكىمشىلىك قاماققا الىندى.
سوت شەشىمىمەن KIA Carnival جولاۋشىسى، ءانشى ءابدىجاپپار القوجا دا ءتارتىپ ساقشىسىنىڭ زاڭدى تالاپتارىنا باعىنباعانى ءۇشىن 10 تاۋلىككە قاماۋعا الىندى.
