قىرعىز-قازاق قول ونەرى - ەكى تۋىس حالىقتىڭ قاتار شاپقان مادەنيەتى. ەكى تۋىس ەل ءبىر-بىرىمەن عاسىرلار بويى ارالاس-قۇرالاس ءومىر ءسۇرىپ كەلەدى. قىز الىسىپ، قۇدا بولعان جاعدايلارى دا ءجيى ورىن الىپ وتىرعان. جاز جايلاۋىندا بىرىگىپ ويىن-ساۋىعىن وتكىزگەن.
وسىنداي تىعىز تۋىستىق جانە كورشىلىك - ەكى ەل مادەنيەتىن ءبىر-بىرىنە جاقىن ەتەدى. اسىرەسە، ول ونەردە ايقىن كورىنىس تابادى. سەبەبى، قول ونەرى - ەكى حالىقتىڭ ەستەتيكالىق ساناسى عانا ەمەس، تۇرمىستىق قاجەتتى وتەۋگە دە قىزمەت اتقارعان. ال، ءبىزدىڭ حالىقتاردىڭ ءومىر سالتى عاسىرلار بويى "نوماديزم" دەپ اتالاتىن كوشپەندى شارۋاشىلىق بولعان ەدى.
سوعان ساي، بىزدەگى ىدىس-اياق، قورجىن، كيىز ءۇي جابدىقتارى، ات ابزەلدەرى، تىپتەن، كيىم-كەشەك ۇلگىلەرى دە وتە ۇقساس، ياعني، سينكرەتتى دامىدى.
بوتەن ەل ادامى ءبىزدىڭ ونەردەگى ايىرماشىلىقتى بىردەن بايقاي المايدى. ونى تەك قىرعىز-قازاقتىڭ ءوزى عانا اجىراتا الادى. مىنە، وسى سەبەپ ءبىزدىڭ بىرلىگىمىزدىڭ جانە تۋىستىعىمىزدىڭ قاينار باستاۋى بولىپ تابىلادى.
قازىر ءبىزدىڭ ەلدەر ءوز الدىنا دەربەس، تاۋەلسىز مەملەكەتتەر. ءبىز الەمدىك ارەنادا جەكە ساياسي سۋبەكت رەتىندە تانىلۋدامىز. ول بۇۇ مۇشەلىگىندە جانە يۋنەسكو تىزىمىندە انىق كورسەتىلگەن. الايدا، ءبىزدىڭ حالىقتار ءوز قول ونەرىن الەمگە تانىتۋدى بىرلەسە اتقارسا عانا - قازاق-قىرعىز قول ونەرى قارقىندى كۇشكە يە بولادى.
وسى نەگىزدە، ءبىز "قازاق-قىرعىز ءستيلى" اتتى ونەردىڭ جاڭا باعىتىن ومىرگە اكەلۋىمىز قاجەت. ءسويتىپ، وزەننىڭ قوس ارناسى بىرىگىپ قۋاتتى دارياعا اينالادى. ول ەكى تۋىس ەلگە بىردەي قىزمەت ەتپەك. بۇل، ارينە، ءبىزدىڭ ءوز ىشىمىزدەگى ايىرماشىلىقتى، وزگە ونەر ەلەمەنتتەرىن جوققا شىعارمايدى. ونى ءبىز ءوزىمىز جاقسى بىلەمىز. سول دا بىزگە جەتكىلىكتى.ال، حالىقارالىق ارەنادا - ءبىز بىرگە اققان داريامىز.
بۇگىنگى سىزدەر وتكىزگەن شارالار سونىڭ باستاماسى. وسى ءىسىمىز جالعاسا بەرسىن.ەكى تۋىس ەلدىڭ بىرلىگى نىعايا بەرسىن. بەيبىت كۇندەردە ونەرىمىز قانات جايا بەرسىن.
ءابدىراشيت باكىرۇلى
