«حالىق» قايىرىمدىلىق قورى ەلىمىزدىڭ كوپتەگەن ازاماتتارى ءۇشىن وزگەرىستەر مەن ءۇمىتتىڭ نەگىزى بولدى. قۇرىلعالى بەرى ءبىلىم بەرۋ، الەۋمەتتىك قورعاۋ، سپورت، توتەنشە جاعداي سالالارىنداعى قايىرىمدىلىققا 85 ملرد تەڭگەدەن استام قارجى ءبولدى.
ونىڭ ىشىندە ءبىلىم بەرۋگە كوپ نازار اۋدارادى. 2020 جىلى قور مەكتەپ وقۋشىلارى مەن كوللەدج ستۋدەنتتەرىنە ارنالعان قازاقستانداعى العاشقى «Ozgeris powered by Halyk Fund» ونلاين بيزنەس-ينكۋباتورىن ىسكە قوسقان بولاتىن.
وسى جوبا اياسىندا 2023 جىلدان بەرى «تالىمگەر» جوباسىن قولعا الىپ، ەكىنشى جىل قاتارىنان مۇعالىمدەر مەن 14 پەن 18 جاس ارالىعىنداعى جاستار ءۇشىن جازعى ءبىلىم بەرۋ لاگەرىن ۇيىمداستىرادى. جازعى لاگەردىڭ ەرەكشەلىگى مۇندا بالالار سىني جانە ستراتەگيالىق ويلاۋ، كوشباسشىلىق، قارجىلىق ساۋاتتىلىق، ەموتسيونالدى ينتەللەكت سىندى الەۋمەتتىك جوبالاۋ باعدارلامالارىن ۇيرەنەدى. بيىل لاگەر 200-دەن اسا قاتىسۋشىنى قابىلدادى. ولاردىڭ بارلىعى رەسپۋبليكالىق ءارى اۋىل وقۋشىلارىنا ارنالعان ۇلتتىق وليمپيادالاردىڭ جەڭىمپازدارى، ءتۇرلى جوبالاردىڭ بەلسەندى قاتىسۋشىلارى.
جازعى لاگەر 16-25 ماۋسىم ارالىعىندا اقمولا وبلىسى، زەرەندى اۋدانى، زەرەندى اۋىلىنداعى ساۋىقتىرۋ كەشەنىندە ءوتتى.
لاگەردىڭ باستى باعىتى – ءبىلىم بەرۋ، سوندىقتان كۇن سايىن بالالارعا ءوز سالاسىنىڭ ۇزدىك ماماندارى ترەنينگتەر، شەبەرلىك ساباقتارى، موتيۆاتسيالىق دارىستەر وتكىزدى. سونداي-اق اساۋبەك ايىمبەتوۆ، سەرىكزات دۇيسەنعازى سىندى قوناقتار وزدەرىنىڭ ومىرلىك تاجىريبەسىن بولىسەدى. ەلىمىزدىڭ ەسترادا جۇلدىزدارىنىڭ قاتىسۋمەن كونتسەرت ۇيىمداستىرىلدى.
جوبانىڭ ماقساتى – جاستار اراسىندا كاسىپكەرلىك الەۋەتتى دامىتۋ، بيزنەس-ويلاۋ داعدىلارىنىڭ، كرەاتيۆتىلىكتىڭ، كوماندادا جۇمىس ىستەي ءبىلۋدىڭ، تايم-مەنەدجمەنتتىڭ جانە سەندىرۋ قابىلەتىنىڭ زاماناۋي ماڭىزدىلىعىن ءتۇسىندىرۋ. «حالىق» قايىرىمدىلىق قورى جازعى لاگەر بارىسىندا دارىندى بالالار مەن جاستار قوعامداستىعىن قۇرىپ، قاتىسۋشىلارعا ءارى قاراي دامۋى ءۇشىن ومىرلىك داعدىلاردى ۇيرەتۋدى كوزدەيدى.
قور قازىرگى ۋاقىتتا ميلليوننان استام بالالار مەن جاستاردى قامتىپ، ەلىمىزدىڭ بولاشاق كوشباسشىلارى مەن ماماندارىن دامىتۋ ءۇشىن جۇمىس ىستەيدى. ەلىمىزدىڭ دامۋىنا ءوز ۇلەسىن قوسقىسى كەلەتىن وي-ءورىسى جوعارى جاستارعا قولداۋ كورسەتەدى.
