بۇگىن – التى الاشتىڭ ابىزى، عۇلاما عالىم، عىلىم ءىسىن ۇيىمداستىرۋشى ءبىرتۋار قايراتكەر، تۇركى حالىقتارى فولكلورتانۋ عىلىمىنا سونى بەتبۇرىس اكەلگەن بىرەگەي تۇلعا سەيىت اسقارۇلى قاسقاباسوۆتىڭ تۋعان كۇنى.
عالىمدى ەسكە الىپ، حالىقارالىق تۇركى اكادەمياسىنىڭ عىلىمي قىزمەتكەرى، فيلولوگيا عىلىمدارىنىڭ كانديداتى اقەدىل تويشانۇلى Facebook پاراقشاسىندا جازبا قالدىردى.
“سەيىت اسقارۇلى باعزى زاماننان جالعاسقان باي مۇرامىزدى جاڭاشا زەرتتەۋدىڭ تەوريالىق-ادىسنامالىق نەگىزدەرىن،قاعيداتىن، جانرلىق ساراسىن جاساۋمەن بىرگە ۇلتىمىزدىڭ وي-ءورىسىن تۇلەتىپ، تۇرلەنىتىپ، العا سۇيرەگەن ويشىل، جاڭعىرتۋشى تۇلعا. ونىڭ قاداۋ-قاداۋ ەشقاشان ەسكىرمەيتىن ىرگەلى مونوگرافيالارى ءبىر توبە، ايگىلى قازاق حالىق قازىناسىنىڭ تاڭداۋلى نۇسقالارى توپتاستىرىلعان، جۇيەلەگەن «بابالار ءسوزى» جۇزتومدىعى ءبىر توبە. جۇزتومدىق فولكلورلىق مۇرا الەم حالىقتارىندا ءالى جارىق كورمەگەن، دەمەك بۇل ەڭبەكپەن تەڭدەسە الاتىن ەشقانداي ميراس دۇنيەجۇزىندە جوق، بولا دا قويماس دەپ ويلايمىن. بۇل – قازاق حالقىنىڭ جادىسى بەرىك، تامىر باۋى تەرەڭ،جاۋھارلى،ىرىستى ەل ەكەندىگىنىڭ كورسەتكىشى، ءارى سەيىت اسقارۇلىنداي اكادەميك ابىزدىڭ كوز مايى، ماڭداي تەرى، جانكەشتى ەڭبەگىنىڭ ۇلكەن دالەلى.
سيىرشىعا دا ەڭبەك ەرىن شۇلەندەي تاراتىپ جۇرگەن سىيشىل حالىقپىز، بەينەتقور اكادەميك اعامىزعا كوزى تىرىسىندە قر ەڭبەك ەرى اتاعى بۇيىرادى دەپ كامىل سەنەم. بابالار ارۋاعى جار بولىپ سەيىت اسقارۇلى كوكە ءجۇز جاساڭىز، كەيۋانا، بارشا عالىم شاكىرتتەردى ماڭدايىنان سيپاپ، اق داستارحان جايىپ، قۇراق ۇشاتىن تامارا تاتەمىز ەكەۋىڭىز نەمەرە-شوبەرە، ءىنى-قارىنداستاردىڭ قىزىعىن كورىپ، تاۋەلسىز ەلىمىزدىڭ ارقاتىرەگى، تۇمارى، ايبىنى بولىپ باقىتتى شات-شادىمان عۇمىر كەشۋگە ءتاڭىر جار بولسىن. «قاسقاباسوۆتا قاسقا جول، باسقالاردا باسقا جول» دەپ اقىن اعامىز ايتقانداي دارا داڭعىل-سۇرلەۋىڭىز ۇزاققا، الىسقا جالعاسا بەرسىن”، دەپ جازدى اقەدىل تويشانۇلى.
