21 ماۋسىم كۇنى پارلامەنت پالاتالارىنىڭ بىرلەسكەن وتىرىسىندا دەپۋتاتتار 2023 جىلعى رەسپۋبليكالىق بيۋدجەتتىڭ اتقارىلۋى تۋرالى ۇكىمەت پەن جوعارى اۋديتورلىق پالاتانىڭ ەسەپتەرىن بەكىتتى، دەپ حابارلايدى «ادىرنا» ءتىلشىسى.
ۇكىمەتتىڭ ءباسپاسوز قىزمەتىنىڭ مالىمەتىنشە، رەسپۋبليكالىق بيۋدجەت كىرىستەرىنىڭ جىلدىق جوسپارى 99,9 پايىزعا (19 ترلن تەڭگە) ورىندالعان. جىلدىق ينفلياتسيا 2 ەسەگە تومەندەپ، 9,8 پايىزدى قۇرادى. جىل قورىتىندىسى بويىنشا ناقتى ەكونوميكالىق ءوسىم 5,1 پايىز بولعان.
بۇل رەتتە رەسپۋبليكالىق بيۋدجەتكە (1,4 ترلن تەڭگە) جانە ۇلتتىق قورعا (1,6 ترلن تەڭگە) تۇسەتىن سالىقتاردىڭ تاپشىلىعى بايقالىپ وتىر. ۇكىمەتتىڭ قارىزى 2024 جىلدىڭ 1 قاڭتارىنداعى جاعداي بويىنشا 25 ترلن تەڭگەنى قۇرادى. ونىڭ 72 پايىزى – بيۋدجەت تاپشىلىعىن قارجىلاندىرۋعا پايدالانىلاتىن ىشكى قارىزدار.
2023 جىلعى يگەرىلمەگەن شىعىستار 73 ملرد تەڭگە بولدى. ال بيۋدجەت قاراجاتىنىڭ ءتيىمسىز پايدالانىلۋى 489 ملرد تەڭگەنى قۇرادى.
پرەمەر-مينيستر ولجاس بەكتەنوۆتىڭ ايتۋىنشا، ەكونوميكالىق كورسەتكىشتەردىڭ جەتكىلىكسىزدىگىنە بىرنەشە فاكتور سەبەپ بولىپ وتىر.
«ءوسۋ قارقىنىنا كۇردەلى گەوساياسي جاعداي مەن ساۋدا سەرىكتەستەرىمىزدىڭ نارىعىنداعى احۋال سىندى بىرنەشە پارامەتر كەدەرگى كەلتىرۋى مۇمكىن. بىراق، سوعان قاراماستان، ۇكىمەت ءوز ماقساتىنا جەتۋ ءۇشىن بارلىق رەزەرۆتىك مۇمكىندىكتەردى بىرىكتىرەدى. ءبىز قازىر ساۋدادا كورسەتكىشتەردىڭ ءبىرشاما تومەندەگەنىن كورىپ وتىرمىز. بۇل، ارينە، سۋ تاسقىنى مەن باسقا كومپونەنتتەردىڭ سالدارى، بىراق بۇل كورسەتكىشتەردى بىرتىندەپ تۇراقتاندىرامىز. بولجامىمىز بويىنشا، ەكونوميكامىزدىڭ كەيبىر سالاسى ءوسۋ ءۇشىن ۇلكەن الەۋەتكە يە بولادى. بۇل قۇرىلىس، ينفراقۇرىلىم، جوندەۋ جۇمىستارى، سونداي-اق وڭدەۋ سالاسى. ۇكىمەت بۇل سالالاردى اۋقىمدى تۇردە قولدايدى»،—دەدى ول.
پرەمەر-مينيستر اۋىل شارۋاشىلىعى سالاسىن قارجىلاندىرۋدى 4 ەسە ارتتىرۋ جوسپارلانعانىن اتاپ ءوتتى.
«540 ميلليارد تەڭگە اۋىل شارۋاشىلىعى وندىرۋشىلەرىمىزگە باعىتتالادى. وتاندىق ءوندىرۋشىنى قولداۋ — ۇكىمەت ءۇشىن وتە ماڭىزدى جانە نەگىزگى تىرەك نۇكتە»،—دەپ تولىقتىردى بەكتەنوۆ.
