تاجىكستان رەسپۋبليكاسىنىڭ پرەزيدەنتى ەمومالي راحمون «تاجىكستان رەسپۋبليكاسىنداعى مەرەكەلەر مەن ادەت-عۇرىپتاردى رەتتەۋ تۋرالى» زاڭعا قول قويدى. بۇل تۋرالى حوۆار اقپارات اگەنتتىگى جازدى، دەپ حابارلايدى “ادىرنا” ۇلتتىق پورتالى.
ول ەلدە «ۇلتتىق مادەنيەتكە جات» كيىم كيۋگە تىيىم سالىناتىنىن مالىمدەدى.
سقپاراتقا سايكەس، ەمومالي راحمون 35 زاڭعا قول قويدى، ونىڭ ىشىندە «تاجىكستان رەسپۋبليكاسىنداعى مەرەكەلەر مەن ادەت-عۇرىپتاردى رەتتەۋ تۋرالى»، «بالانى وقىتۋ مەن تاربيەلەۋدەگى جاۋاپكەرشىلىك تۋرالى»، «تاجىك ۇلتتىق ۋنيۆەرسيتەتى تۋرالى»، «تاجىكستان ۇلتتىق ۋنيۆەرسيتەتى تۋرالى»، «ەسەپتەۋ كورسەتكىشتەرى تۋرالى» زاڭدار جانە ت.ب. بار.
«تاجىكستان رەسپۋبليكاسىنداعى مەرەكەلەر مەن ادەت-عۇرىپتاردى رەتتەۋ تۋرالى» زاڭدا باسقالارمەن قاتار «ۇلتتىق مادەنيەتكە جات» كيىم كيۋگە جانە ساتۋعا تىيىم سالىنادى. زاڭدى ورىنداماعانى ءۇشىن ايىپپۇل قاراستىرىلعان. بۇل رەتتە كيىمنىڭ قاي ءتۇرى «ۇلتتىق مادەنيەتكە جات» دەپ سانالاتىنى ناقتى كورسەتىلمەگەن.
حوۆار مالىمەتىنشە، جاڭا رەداكتسياداعى زاڭدار ۇلتتىق مادەنيەتتىڭ شىنايى قۇندىلىقتارىن قورعاۋعا، مەرەكەلەر مەن سالت-داستۇرلەردى وتكىزۋ كەزىندە ىرىمشىلدىق پەن نانىم-سەنىمگە، ىسىراپشىلدىققا جول بەرمەۋگە، تاجىكستان حالقىنىڭ رۋحاني جانە الەۋمەتتىك-ەكونوميكالىق دەڭگەيىن كوتەرۋگە، سونداي-اق بالانىڭ قۇقىقتارى مەن بوستاندىقتارىن قورعاۋ، بالانى ادامگەرشىلىك، پاتريوتتىق ماقتانىش، ۇلتتىق جانە جالپىادامزاتتىق قۇندىلىقتاردى قۇرمەتتەۋ رۋحىندا وقىتۋ جانە تاربيەلەۋگە باعىتتالعان.
ايتا كەتەيىك، بۇعان دەيىن تاجىكستان حيدجاب كيۋگە تىيىم سالعالى جاتقانىن حابارلاعان ەدىك.
زاڭعا سايكەس، قازىر تاجىكستاندا مۇنداي كيىمدى ەلگە اكەلۋگە، ونى ساتۋعا جانە قوعامدىق ورىنداردا كيۋگە رەسمي تۇردە تىيىم سالىنعان - بۇل ايىپپۇلعا اكەپ سوعادى. بۇل تىيىمدى بۇزعان تۇلعالارعا 7920 سوموني نەمەسە قازىرگى باعام بويىنشا 733 دوللار ايىپپۇل سالىنۋى مۇمكىن، ال شەنەۋنىكتەرگە 39600 سوموني نەمەسە 3668 دوللار كولەمىندە ايىپپۇل سالىنادى.
