مەملەكەت باسشىسى قاسىم-جومارت توقاەۆ توتەنشە جاعدايلار ءمينيسترى شىڭعىس ءارىنوۆتى قابىلدادى. بۇل تۋرالى بۇگىن، 20 ماۋسىمدا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
پرەزيدەنتكە توتەنشە جاعدايلار مينيسترلىگىنىڭ اتقارىپ جاتقان جۇمىستارى مەن الداعى جوسپارى جونىندە ەسەپ بەرىلدى. سونداي-اق مينيسترلىكتىڭ شتاتتىق قۇرىلىمىن وڭتايلاندىرۋ جانە ماتەريالدىق-تەحنيكالىق قۇرالدارمەن جابدىقتالۋ دەڭگەيىن ارتتىرۋ ماسەلەلەرى تۋرالى باياندالدى.
شىڭعىس ءارىنوۆ ازاماتتىق قورعاۋ اكادەمياسىنىڭ قۇرىلىسى، اۋە اۆياتسياسى پاركىن جاڭارتۋ جانە كاسپي تەڭىزىنىڭ جاعاسىندا ۇلتتىق تەڭىز جاساعىن قۇرۋ جۇمىستارى جايىندا حابارلادى. ايتۋىنشا، 20 ءورت ءسوندىرۋ دەپوسىنىڭ قۇرىلىسى جۇرگىزىلىپ جاتىر، سونداي-اق ەلوردادا تەز قۇراستىرىلاتىن ءورت ءسوندىرۋ دەپوسى مەن جاتاقحانا سالۋ جونىندەگى پيلوتتىق جوبا ىسكە قوسىلعان. بۇدان بولەك، مينيسترلىك ءارتۇرلى تابيعي جانە تەحنوگەندىك سيپاتتاعى توتەنشە جاعدايلاردىڭ الدىن الۋ جانە جەدەل ارەكەت ەتۋ شارالارىن جەتىلدىرۋ جۇمىستارىن جۇرگىزۋدە.
كەزدەسۋ سوڭىندا قاسىم-جومارت توقاەۆ ازاماتتاردىڭ قاۋىپسىزدىگىن قامتاماسىز ەتۋ جانە تجم قۇرىلىمىن جەتىلدىرۋ جونىندە بىرقاتار ناقتى مىندەت جۇكتەدى.
