تابيعات جاناشىرى عاني نازاربەك اكىمدىك جاۋىپ جاتقان ورداعى جان-جانۋارلاردىڭ قۇتقارىلىپ جاتقانىن جاريالادى، دەپ حابارلايدى "ادىرنا" ۇلتتىق پورتالى.
"Tasbaqa" قورىنىڭ ەرىكتىلەرىنىڭ تۇركىستان وبلىسىنا ەكسپەديتسياسى توعىز كۇنگە سوزىلدى.
ەكسپەديتسياعا جوبا ۇيلەستىرۋشىسى جانە «تاسباقا» قورىنىڭ جەتەكشىسى يۋليا زاۋگگ، ەكولوگ ۆلاديمير تەرەنتەۆ، قوعام قايراتكەرى جانە «سىرداريا-تۇركىستان» تابيعي ساياباعىنىڭ عىلىمي قىزمەتكەرى عاني نازاربەك، سونداي-اق مال دارىگەرى ولەگ حان قاتىستى.
سىرداريا - تۇركىستان ءموتپ تۋريزم ءبولىمى مەڭگەرۋشىسى Facebook جەلىسىندەگى پاراقشاسىندا جانۋارلاردى قۇتقارۋ ساتىنەن بەينە جاريالادى. جازبادا وتىرار اۋدانىنداعى وردى اكىمشىلىك جاپتىرىپ جاتقاندىعىن حابارلاعان. اكىمدىكتىڭ جوسپارىن ەستىگەن سوڭ "Tasbaqa" قورىنىڭ ەرىكتىلەرى مەن سىرداريا-تۇركىستان ءموتپ قىزمەتكەرلەرى بىرلەسىپ قر قىزىل كىتابىنا ەنگەن كەلەس كەسىرتكەلەرىن ورلاردان شىعارۋعا ات سالىسقان.
"ترانشەيادان شىعارعان كەلەس كەسىرتكەسىن قىزىقۇمعا اكەلىپ، جىبەرىپ جاتىرمىز. كەسىرتكە اشۋلى. تابيعاتتا ءومىر سۇرە بەرىڭىز ەندى", - دەلىنگەن عاني نازاربەك جاريالاعان ۆيدەودا.
وتىرار اۋدانىنداعى ترانشەيالاردى سالۋ تاجىريبەسى قازاقستاندا زاڭسىز، بىراق ەلدىڭ وڭتۇستىگىندە ءالى كۇنگە دەيىن ءجيى كەزدەسەتىنى بەلگىلى بولدى. كەزدەسكەن شوپاندار زەرتتەۋشىلەرگە كەيدە وكوپتا مالدىڭ دا قىرىلىپ قالاتىنىن ايتتى. مۇنى راستاۋ ءۇشىن ەكسپەديتسيا مۇشەلەرى ترانشەيالاردان ولگەن بۇزاۋلاردىڭ، قۇلىنداردىڭ، قوزىلاردىڭ جانە ەرەسەك اۋىلشارۋاشىلىق جانۋارلارىنىڭ قالدىقتارىن تاپتى.
ماماندار ترانشەيادان بارلىعى 100-دەن استام جانۋاردى قۇتقارىپ، تاعى 50-دەن استامى ءولى تابىلدى.
ايتا كەتەيىك، كەلەس كەسىرتكەسى نە ۆاراندا دەپ اتالاتىن باۋىرمەن جورعالاۋشىلار - كەسىرتكەلەردىڭ ىشىندەگى جىرتقىشتار توبىنا جاتادى. كەلەس كەسىرتكە قازاقستاننىڭ وڭتۇستىك وڭىرىندەگى قىزىلقۇم مەن سىرداريا وزەنىنىڭ ءوڭ جاعالاۋىنداعى ءشولدى اۋماقتاردا كەزدەسەدى، بىراق سانى از. سوندىقتان حالىقارالىق تابيعات قورعاۋ وداعىنىڭ جانە 2008 جىلى قازاقستاننىڭ قىزىل كىتابىنا ەنگەن.
