قازاقستاننىڭ ءۇش قالاسىندا – كوكشەتاۋ، سەمەي جانە وسكەمەندە رەسەيلىكتەر 2024 جىلعا ۋادە ەتكەن جەو قۇرىلىسىنىڭ باستالۋى كەيىنگە شەگەرىلەتىنى ايتىلدى، دەپ حابارلايدى “ادىرنا” ۇلتتىق پورتالى رەسەيلىك ەنەرگەتيكا سالاسىنداعى ساۋدا باسىلىمى «پەرەتوك.رۋ»-عا سىلتەپ.
«ءبىز قۇرىلىستىڭ ەرتەرەك ەمەس، 2025 جىلى باستالاتىنىن بولجاپ وتىرمىز»، - دەدى پەتەربۋرگ حالىقارالىق ەكونوميكالىق فورۋمى (سپيەف) الاڭىندا رەسەيلىك «ينتەر راو» كورپوراتسياسىنىڭ باس ديرەكتورى سەرگەي درەگۆال.
ونىڭ ايتۋىنشا، جوبالاردا نەگىزىنەن رەسەيلىك تەحنيكانى پايدالانۋ جوسپارلانۋدا.
«ءبىز كەلىسىمشارت بويىنشا جابدىقتى جەتكىزۋشىمىز جانە قۇرىلىستى قاداعالايمىز، ءبىز مەردىگەر بولمايمىز; ءبىز رەسەيلىك تەحنيكانى، ونىڭ ىشىندە ۋتز-دى (ينتەر راو-عا تيەسىلى – باسىلىم) جەتكىزۋگە تىرىسامىز»، - دەدى درەگۆال.
ايتا كەتەيىك، ءبىر اپتا بۇرىن، 28 مامىردا ۇكىمەت وتىرىسىندا قر ەنەرگەتيكا ءمينيسترى الماسادام ساتقاليەۆ كوكشەتاۋدا جىلۋ ەلەكتر ورتالىعىنىڭ قۇرىلىسىن باستاۋ بيىلعى جىلدىڭ جازىنا جوسپارلانعانىن مالىمدەگەن بولاتىن.
ەسكە سالايىق، بۇعان دەيىن قازاقستان مەن رەسەي قازاقستان رەسپۋبليكاسىنىڭ ەنەرگەتيكا مينيسترلىگى مەن رەسەي فەدەراتسياسىنىڭ ەنەرگەتيكا مينيسترلىگى اراسىندا كوكشەتاۋ جىلۋ ەلەكتر ورتالىعى، سەمەي جىلۋ ەلەكتر ورتالىعى، وسكەمەن جىلۋ ەلەكتر ورتالىعى قۇرىلىس جوبالارى بويىنشا ىنتىماقتاستىق تۋرالى ءوزارا مەموراندۋمعا قول قويعان بولاتىن. جوبانى جۇزەگە اسىرۋعا قازاقستاننىڭ ۋاكىلەتتى ۇيىمدارى «سامۇرىق-ەنەرگو» اق، ال رەسەيدەن «INTER RAO - Export» جشس جاۋاپتى.
