بيىل قۇربان ايت مەرەكەسى 16 ماۋسىمدا باستالادى. بۇل تۋرالى قازاقستان مۇسىلماندارى ءدىني باسقارماسى ايتتى، دەپ حابارلايدى «ادىرنا» ءتىلشىسى.
«2024 جىلى 6 ماۋسىمدا جاڭا ايدىڭ كورىنۋىنە بايلانىستى بيىل زۇلحيججا ايى 7 ماۋسىمدا باستالىپ، اراپا 15 ماۋسىمعا، ال قۇربان ايت 16 ماۋسىمعا ساي كەلەدى»،—دەلىنگەن حابارلامادا.
بۇعان دەيىن قمدب ءدىني مەرەكەلەر كەستەسىندە قۇربان ايت 17 ماۋسىم بولىپ بەكىتىلگەن ەدى. وسى جىلى مەرەكەنىڭ العاشقى كۇنى جەكسەنبىگە ءتۇسىپ تۇرعاندىقتان، قازاقستاندىقتارعا قوسىمشا دەمالىس بەرىلمەيدى.
«2024 جىلعا ارنالعان مەرەكەلەر مەن دەمالىس كۇندەرىنىڭ كۇنتىزبەسى جاسالعاندا، قمدب رەسمي تۇردە قۇربان ايت 17 ماۋسىمعا سايكەس كەلەتىنىن حابارلادى. بۇل كۇن جۇمىس كۇنى بولعاندىقتان، دەمالىس بولادى دەپ جوسپارلانعان. قازىر قمدب قۇربان ايت 16 ماۋسىمعا ساي كەلەدى دەپ جاريالادى. دەمالىس كۇندەرىنە ساي كەلەتىن ءدىني مەرەكەلەر جىلجىتىلمايدى. سوندىقتان دەمالىس كۇنى اۋىسپايدى»،—دەپ ءتۇسىندىردى ەڭبەك جانە حالىقتى الەۋمەتتىك قورعاۋ مينيسترلىگى.
