بۇگىن، 7 ماۋسىمدا ىشكى ىستەر مينيسترلىگى كولىك جۇرگىزۋشىلەرىنە تاعى ءبىر مارتە ۇندەۋ جاسادى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
ءىىم اكىمشىلىك پوليتسيا كوميتەتى توراعاسىنىڭ ورىنباسارى الىبەك كەڭىسپاەۆ ازاماتتاردى جول ءجۇرىسى قاعيدالارىن ساقتاۋعا شاقىردى. ايتۋىنشا، پوليتسيا جول اپاتتارىن بولدىرماۋ، جول ءجۇرىسى قاعيدالارىن بۇزۋدىڭ الدىن الۋ بويىنشا تۇراقتى تۇردە ءتۇسىندىرۋ جانە پروفيلاكتيكالىق جۇمىستارىن جۇرگىزەدى.
«وسى ماقساتتا كۇن سايىن تراسسالاردا شامامەن 1,5 مىڭ پاترۋلدىك پوليتسەي قىزمەت ەتەدى. ەكيپاجدار 50 شاقىرىم سايىن ورنالاستىرىلعان. جۇرگىزۋشىلەر كوبىنەسە جول ەرەجەلەرىن ەلەمەيدى. جىلدامدىق رەجيمىن ساقتامايدى. قارسى جولعا شىعىپ كەتىپ جاتادى. مىسالى 5 ماۋسىمدا اقتوبە وبلىسىندا Toyota Alphard اۆتوكولىگىنىڭ جۇرگىزۋشىسى ءرۋلدى باسقارا الماي، اۋدارىلىپ كەتتى. اپاتقا دەيىن ونى پوليتسيا قىزمەتكەرلەرى توقتاتىپ، جول ەرەجەسىن ساقتاۋ تۋرالى ەسكەرتكەن بولاتىن. وقيعا سالدارىنان ءتورت ادام قازا تاپتى. جۇرگىزۋشىلەردى تاعى دا جولدا ساق بولۋعا شاقىرامىن!»—دەدى ول.
ايتا كەتەيىك، وتكەن جىلى جىلى قازاقستان اۋماعىندا 15 مىڭنان استام جول-كولىك وقيعاسى تىركەلدى. كولىك اپاتى كەزىندە 5 مىڭ ازامات قازا تاۋىپ، 19 مىڭنان استام ادام جاراقات الدى.
