قاراعاندى وبلىسى بۇكىل ەلمەن بىرگە قازاقستان رەسپۋبليكاسىنىڭ مەملەكەتتىك رامىزدەرى كۇنىن كەڭىنەن اتاپ وتۋدە.
وبلىس ورتالىعىندا تۋ تۇعىرىنىڭ ماڭىندا جۇرتشىلىقتىڭ، ەرىكتىلەردىڭ، جاستاردىڭ قاتىسۋىمەن "تۋعان جەرىم – قازاقستان!" پاتريوتتىق فورۋمنىڭ اشىلۋى بولدى. الاڭدا ءۇش مىڭ ادام ءبىر ۋاقىتتا ەلىمىزدىڭ ءانۇرانىن ورىندادى.
بۇل وقيعا بىرلىك پەن وتانىمىزعا دەگەن سۇيىسپەنشىلىكتى كورسەتەدى. شارا بارىسىندا تۋ شەرۋى ءوتتى.
تۋ ۇستاۋشىلار قاتارىندا ت. بيگەلدينوۆ اتىنداعى قاراعاندى قالاسىنىڭ "جاس ۇلان" مەكتەبىنىڭ تاربيەلەنۋشىلەرى بولدى.
– مەملەكەتتىك رامىزدەر كۇنى ءبىزدىڭ جۇرەگىمىزدە ەرەكشە ورىن الادى، ويتكەنى ءبىزدىڭ مەملەكەتىمىزدىڭ رامىزدەرى جاي عانا اتريبۋتتار ەمەس، بۇل ءبىزدىڭ تاريحىمىزدىڭ، مادەنيەتىمىزدىڭ جانە بىرلىگىمىزدىڭ بەينەسى. قازاقستاننىڭ تۋى، ەلتاڭباسى مەن ءانۇرانى بۇكىل الەمگە تانىمال بولدى، بۇل ەلىمىز ءۇشىن ماقتانىش سەزىمىن تۋدىرادى، – دەدى قاراعاندى وبلىسىنىڭ اكىمى ەرماعانبەت بولەكپاەۆ. – مەن مۇندا جاستاردى كورگەنىمە قۋانىشتىمىن. ءبىزدىڭ مىندەتىمىز – جاستاردىڭ بويىندا وتانسۇيگىشتىك سەزىمىن جانە ەلىمىزگە، ونىڭ باي تاريحى مەن ۇلى تۇلعالارىنا دەگەن ماقتانىش سەزىمىن تاربيەلەۋ.
فورۋمدا ازاماتتاردىڭ پاتريوتتىق تاربيەسىن دامىتۋعا قوسقان ۇلەسى،
كاسىبي جەتىستىكتەرى، بەلسەندى ازاماتتىق ۇستانىمى ءۇشىن العىس حاتتار تابىستالدى.
– 2014 جىلى مەن قازاقستان ءانۇرانىن ورىنداپ، انت قابىلدادىم. ون جىل بويى وتانعا، قازاقستان حالقىنا قىزمەت ەتىپ كەلەمىن، بۇل ۇلكەن جاۋاپكەرشىلىك. مەملەكەتتىك تۋ كوتەرىلگەن سايىن مەن ەلىمدى ماقتان تۇتامىن، – دەيدى ماراپاتتالعان تجد قىزمەتكەرلەرىنىڭ ءبىرى – ازاماتتىق قورعاۋ كاپيتانى دامير ساعاتتاەۆ. – وسى كوكتەمدە ءبىزدىڭ ەلىمىز سۋ تاسقىنى سەكىلدى ۇلكەن سىناقتان ءوتتى. قازاقستان حالقى بىرىكتى: قۇتقارۋشىلار عانا ەمەس، كومەككە قاراپايىم جاناشىر ادامدار دا كەلدى. ءبىز كۇشىمىز بىرلىگىمىزدە!
ەتنومادەني بىرلەستىكتەردىڭ باسشىلارى وتانداستارىمىزدى مەملەكەتتىك رامىزدەر كۇنىمەن قۇتتىقتادى.
– بۇل مەرەكە ءبىزدىڭ بولمىسىمىز بەن ەگەمەندىگىمىزدى بىلدىرەدى. ءبىزدىڭ باستى وقيعالارىمىز مەملەكەتتىك ءانۇراندى ورىنداۋدان باستالادى، – دەپ اتاپ ءوتتى "ۆايناح" وبلىستىق شەشەن-ينگۋش ەتنومادەني بىرلەستىگىنىڭ توراعاسى ۋۆايس جاناەۆ.
الاڭنان قر مەملەكەتتىك رامىزدەر كۇنىنە ارنالعان مەرەكەلىك اۆتو-, موتو- جانە ۆەلوجارىس باستالدى.
ونى قر ەڭبەك سىڭىرگەن جاتتىقتىرۋشىسى، قاراعاندى وبلىسىنىڭ قۇرمەتتى ازاماتى ۆالەري گروموۆ اشتى.
– بۇگىن سالتاناتتى كۇن. ءبىزدىڭ كوش باستار جاستارىمىز وسىندا جينالعانى كەرەمەت. جاستار جاڭا قازاقستاندى قۇرۋى كەرەك. ءبىزدىڭ ارقايسىمىزدا ءبىرىنشى كەزەكتە پاتريوتيزم سەزىمى بولۋى ءتيىس. ءانۇران ەستىلگەن كەزدە قولىمىز بىردەن جۇرەك تۇسىنا كوتەرىلەدى. بىرگە بولساق، ءبىز جەڭىلمەيمىز! – دەدى ۆالەري گروموۆ.
وبلىس بويىنشا مەرەكەلىك ءىس-شارالار: پاتريوتتىق اكتسيالار، چەللەندجدەر، اۆتو- جانە ۆەلوجارىستار، كونتسەرتتەر وتەدى.
تۇرعىندار مەملەكەتتىك تۋدى پاتەرلەرىنىڭ بالكوندارىنا ورنالاستىرادى. ال كوشەلەردە مەملەكەتتىك رامىزدەرى بار جالاۋلار مەن ستيكەرلەر تاراتىلادى. اقتوعاي اۋدانىندا فلاگشتوكتىڭ اشىلۋى ءوتتى.
