بۇگىن نيدەرلاند پرەمەر-مءينيسترى مارك ريۋتتە قازاقستانعا ساپارى اياسىندا Maqsut Narikbayev University (MNU) ستۋدەنتتەرىمەن كەزدەستى. اتالعان ءىس-شارا نيدەرلاند كورولدىگىنىڭ قازاقستانداعى ەلشىلىگىنىڭ قولداۋىمەن ۇيىمداستىرىلدى. ريۋتتە مىرزا كەزدەسۋ بارىسىندا نيدەرلاندىنىڭ ەۋروپاداعى ءرولى، قازاقستانمەن ەكى جاقتى ىنتىماقتاستىعى، ءوزىنىڭ ساياسي تاجىريبەسى، يننوۆاتسيا، مادەني الماسۋ جانە ەكونوميكالىق مۇمكىندىكتەرى سياقتى ءتۇرلى سالالارعا قوسقان ۇلەسى تۋرالى ايتىپ بەردى.
MNU باسقارما توراعاسى تالعات نارىكباەۆ ۋنيۆەرسيتەتكە كەلگەن قادىرلى قوناققا ءوز العىسىن ءبىلدىرىپ، ەكى جاقتى قارىم-قاتىناستىڭ دامۋىنا تيگىزگەن اسەرى ءۇشىن ريزاشىلىعىن ءبىلدىردى.
«ءسىزدىڭ Maqsut Narikbayev University-گە ساپارىڭىز ءبىزدىڭ بۇكىل ستۋدەنتتەر مەن وقىتۋشىلار قاۋىمى ءۇشىن ناعىز مارتەبە جانە زور قۇرمەت. وسىلايشا، ءسىزدىڭ ۋنيۆەرسيتەت قابىرعاسىنا كەلۋىڭىز – قازاقستان مەن نيدەرلاندىنىڭ جوعارى ءبىلىم بەرۋ سالاسىنداعى تىعىز بايلانىستارىنىڭ بىردەن-ءبىر كورىنىسى دەپ ەسەپتەيمىن. سوندىقتان MNU گۋمانيتارلىق جانە الەۋمەتتىك عىلىمداردىڭ جەتەكشى ۋنيۆەرسيتەتى رەتىندە ءبىزدىڭ ەكى ەل اراسىنداعى بايلانىستى نىعايتۋدا شەشۋشى ءرول اتقاراتىنىن ماقتان تۇتادى», - دەدى ول نيدەرلاند ۇكىمەتىنىڭ باسشىسىنا.
پرەمەر-مينيستر كەزدەسۋ بارىسىندا قازاقستانعا ساپارىنىڭ ماقساتىن تۇسىندىرۋدەن باستاپ، بۇل ونىڭ ءبىزدىڭ ەلگە العاشقى ساپارى ەمەس ەكەنىن اتاپ ءوتتى.
«ءبىز ەكونوميكالىق قاتىناستار كونتەكستىندەگى پوتەنتسيالدى ىنتىماقتاستىق تاقىرىبىن كوتەرىپ، سونىڭ ىشىندە ءداستۇرلى ەنەرگيا كوزدەرىنەن ءداستۇرلى ەمەس كوزدەرىنە كوشۋ ارقىلى ەكونوميكامىزدى ءارتاراپتاندىرۋ تۋرالى ايتىپ وتىرمىز. بۇل قازاقستاندا وكىلدىگى بار كومپانيالارمەن تالقىلانىپ كەلەدى. وعان قوسا، قورلار مەن رەسۋرستاردى باسقارۋ قازاقستانمەن قۇرعان سەرىكتەستىگىمىزدىڭ ماڭىزدى اسپەكتىسى بولىپ سانالادى. ارينە، قازىرگى ۋاقىتتا كومىرسۋتەكتەر مەن جاسىل تەحنولوگيالار شەشۋشى ءرول اتقارۋدا، سەبەبى قازىر تاڭدا ەنەرگيا وتە ماڭىزدى. وسى تۇرعىدا ءبىز ماروككو، ومان جانە باسقا دا ەلدەرمەن جۇمىس ىستەيمىز، سونىڭ ىشىندە قازاقستان دا وسى ءتىزىمنىڭ ءبىر بولىگى سانالادى. ءبىز ەكونوميكانىڭ وسىنداي مودەلىنە كوشۋىمىز كەرەك جانە وسى ماسەلەلەردى بىرلەسىپ شەشۋگە تىرىسامىز. بۇگىنگى وسى كەزدەسۋ مەن ءۇشىن ۇلكەن مارتەبە», — دەدى ول.
بۇل كەزدەسۋدىڭ نەگىزگى ماقساتى نيدەرلاند كورولدىگىمەن ىنتىماقتاستىقتى دامىتۋ جانە ستۋدەنتتەرگە نيدەرلاند پرەمەر-مينيسترىنە ءوز سۇراقتارىن قويۋعا مۇمكىندىك بەرۋ.
ستۋدەنتتەر، وقىتۋشىلار جانە ۋنيۆەرسيتەت قوناقتارى اتالعان ءىس-شاراعا اسا قىزىعۋشىلىق تانىتىپ، ءبىزدىڭ زامانىمىزدىڭ ەڭ تاجىريبەلى ساياساتكەرلەرىنىڭ بىرىمەن كەزدەسۋگە جانە ەكىجاقتى قارىم-قاتىناستاردى دامىتۋدىڭ ماڭىزدى حالىقارالىق ماسەلەلەرى مەن پەرسپەكتيۆالارى تۋرالى تىكەلەي ءبىلۋدىڭ بىرەگەي مۇمكىندىگىنە يە بولدى. سونىمەن قاتار كەزدەسۋ بارىسىندا نيدەرلاندى مەن قازاقستان اراسىنداعى ساياسي قاتىناستاردان باستاپ، مادەني اسپەكتىلەرگە دەيىنگى تاقىرىپتار كەڭ اۋقىمدا تالقىلاندى.
سونداي-اق بۇل كەزدەسۋ ۋنيۆەرسيتەتتىڭ اكادەميالىق ومىرىنە ەلەۋلى ۇلەس قوستى، حالىقارالىق بايلانىستاردى نىعايتۋعا ىقپال ەتتى جانە قازاقستان مەن نيدەرلاندى اراسىنداعى ودان ءارى ىنتىماقتاستىق ءۇشىن جاڭا بەلەستەردى اشتى.
ايتا كەتۋ كەرەك، وتكەن جىلى Maqsut Narikbayev University فرانتسيا پرەزيدەنتى ەممانۋەل ماكروندى قابىلداعان. مۇنداي كەزدەسۋلەر ستۋدەنتتەرگە الەمدىك كوشباسشىلارمەن تىكەلەي بايلانىس ورناتۋعا مۇمكىندىك بەرىپ، ولاردىڭ كوزقاراستارى مەن تاجىريبەلەرى تۋرالى بىلۋگە جول اشادى.
