ايەلىن ءولتىردى دەپ سوتتالعان ەكس-مينيستر قۋاندىق بيشىمباەۆتى قىلمىس ورنىندا ۇستاعان پوليتسيا قىزمەتكەرلەرى جاۋاپقا تارتىلدى. بۇل اقپاراتتى ىشكى ىستەر مينيسترلىگىنىڭ ءباسپاسوز قىزمەتى راستادى، دەپ حابارلايدى “ادىرنا” ۇلتتىق پورتالى.
استانا پاترۋلدىك پوليتسيا پولكىنىڭ ينسپەكتورىنا قىزمەتتىك ءتارتىپتى بۇزعانى ءۇشىن سوگىس جاريالانعان.
ول ەكس-ءمينيستردى ۇستاعان كەزدە «ول ءوزى مازاڭدى العان شىعار؟» دەپ سۇراعان. وسى اڭگىمە ۆيدەوعا ءتۇسىپ قالعان.
وسى ۆيدەو سوتتا كورسەتىلىپ، استانا پوليتسيا دەپارتامەنتى قىزمەتتىك تەكسەرۋ باستاعان. قىزمەتكەر قاتاڭ سوگىس الدى.
ەكىنشى قىزمەتكەر قوعامدىق ورىندى لاستاعانى ءۇشىن جازالاندى. ول كوشەدە تۇرعاندا جەرگە تۇكىرگەن.
«قر «قۇقىق قورعاۋ قىزمەتى تۋرالى» زاڭىنىڭ 19, 56-57-باپتارىنا، سونداي-اق قىزمەتتىك ءتارتىپتى بۇزعانى ءۇشىن تارتىپتىك كوميسسيانىڭ شەشىمىنە سايكەس پاترۋلدىك پوليتسيا پولكى قىزمەتىنىڭ ينسپەكتورىنا سوگىس جاريالاندى. قازاقستان رەسپۋبليكاسى اقبتك-ءنىڭ 434-2-بابىنىڭ تالاپتارىن بۇزعانى ءۇشىن (قوعامدىق ورىنداردى لاستاۋ) استانا قالاسى ءىىب ەسىل اۋدانىنىڭ جەدەل ۋاكىلىنە قاتاڭ سوگىس جاريالاندى»، – دەلىنگەن ءباسپاسوز حابارلاماسىندا.
ەسكە سالا كەتسەك، ءوزىنىڭ ازاماتتىق نەكەدەگى ايەلىن ءولتىردى دەگەن كۇدىكپەن ۇستالىپ، سوت ءىسى اشىق جۇرگىزىلگەن بۇرىنعى ۇلتتىق ەكونوميكا ءمينينسترى قۋاندىق بيشىمباەۆ 24 جىلعا جانە ونىڭ تۋىسى باقىتجان بايجانوۆقا 4 جىلعا باس بوستاندىعىنان ايىرىلعان بولاتىن.
