يسپانيالىق شابۋىلشى كارليتوس ەلوردالىق كلۋبتىڭ جاتتىقتىرۋشىلار شتابىمەن جانجالداسىپ، “استانادان” كەتتى، دەپ حابارلايدى “ادىرنا” ۇلتتىق پورتالى Vesti.kz سايتىنا سىلتەمە جاساپ.
بۇعان دەيىن رەسمي اقپاراتتار بويىنشا، كلۋب 33 جاستاعى سپورتشىسىنىڭ مەرزىمىنەن بۇرىن كەتۋىن قازاقستانداعى قيىن بەيىمدەلۋ ناتيجەسىندە ءتۇسىندىردى. الايدا جاعدايعا جاقىن دەرەككوزدىڭ ايتۋىنشا، كارليتوس باپكەرلەرمەن، اتاپ ايتقاندا گريگوري بابايانمەن ءتىل تابىسپاعان.
مالىمەتكە سايكەس، گرەكيالىق “لاميادان” اۋىسقان شابۋىلشى ىمىراعا كەلمەي، «استانادان» كەتۋگە بەل بۋدى. ول كوماندا سابىندا ءۇش كەزدەسۋ وتكىزىپ، ناتيجەلى بولمادى.
ايتا كەتسەك، گرەكيا چەمپيوناتىنىڭ سوڭعى ماۋسىمىندا شابۋىلشى لاميا سابىندا 21 ماتچ وتكىزىپ، 10 گول سوعىپ، بەس ناتيجەلى پاس بەرىپ، ۇلتتىق دەڭگەيدەگى كوماندا تاريحىنداعى ۇزدىك بومباردير اتاندى.
كارليتوس سونىمەن قاتار يسپاندىق «توررەليانو»، «ەلچە»، «ونتەنەنتە»، «فۋەنلابرادا»، «نوۆەلدا»، «ەلدەنسە» جانە «ۆيلياررەال ب»، رەسەيلىك «پەتروترەست»، كيپرلىك «اريس»، پولياك «ۆيسلا» (كراكوۆ) جانە لەگيا، ءباا-دەن “ال-ۆاحدا” جانە گرەك “پاناتينايكوسىندا” وينادى.
