تىكۇشاق اپاتىنان قازا تاپقان يران پرەزيدەنتى يبراحيم ءرايسيدىڭ جەرلەۋ راسىمىنە قازاقستان اتىنان ءماجىلىس سپيكەرى ەرلان قوشانوۆتىڭ قاتىساتىنى بەلگىلى بولدى. ول پرەزيدەنتتىڭ تاپسىرماسىنا وراي بۇگىن جولعا شىقتى. بۇل تۋرالى ءماجىلىستىڭ ءباسپاسوز قىزمەتى رەسمي تۇردە مالىمدەدى، دەپ حابارلايدى “ادىرنا” ۇلتتىق پورتالى.
ايتا كەتەيىك، يبراحيم رايسي بەيسەنبىدە، ياعني 23 مامىردا ەلدىڭ سولتۇستىك-شىعىسىنداعى مەشحەد قالاسىندا جەر قوينىنا تاپسىرىلادى.
ەستەرىڭىزگە سالساق، يران پرەزيدەنتى مىنگەن تىكۇشاق شىعىس ءازىربايجان پروۆينتسياسىنىڭ تاۋلارىندا (اكىمشىلىك ورتالىعى – تابريز), ءازىربايجاننىڭ ناحيچەۆان اۆتونوميالىق رەسپۋبليكاسىمەن شەكارادا ورنالاسقان دجۋلفا قالاسىنىڭ ماڭىندا تەگەراننان سولتۇستىك-باتىسقا قاراي 600 شاقىرىم جەردە اپاتقا ۇشىرادى.
