ساۋدا جانە ينتەگراتسيا ءمينيسترى ازىق-تۇلىك باعاسىنا قاتىستى مالىمدەمە جاسادى، دەپ حابارلايدى "ادىرنا" ۇلتتىق پورتالى.
ۇكىمەت وتىرىسىندا مينيستر ارمان شاققاليەۆ تىلشىلەردىڭ ساۋالىنا جاۋاپ بەردى.
باق وكىلدەرى مينيستردەن قازاقستان قىرعىزستان جانە وزبەكستانمەن ساۋدا لوگيستيكالىق كەشەندەرىن سالۋ ءۇشىن كەلىسسوز جۇرگىزىلىپ جاتقانىن ايتىپ، الداعى 10 جىلدا قازاقستاندا ازىق-تۇلىك باعاسىنىڭ ءمان-جايىن سۇرادى.
ءوز جاۋابىندا مينيستر كەلىسسوزگە ساي جوبانىڭ 3-5 جىلدا ىسكە اساتىنىن جانە ول ازىق-تۇلىك قاۋىپسىزدىگىن قامتاماسىز ەتۋدى كوزدەيتىنىن جەتكىزدى.
«سوندىقتان ىشكى نارىقتى ازىق-تۇلىكپەن قامتۋ الداعى جىلداردىڭ ەنشىسىندە. ءبىز بارلىق پوزيتسيا بويىنشا يمپورتقا تاۋەلدى ەمەسپىز، ازىق-تۇلىك تۇرعىسىنان ايتىپ تۇرمىن. ەڭ باستى تاۋارلار بويىنشا ءوزىمىزدى قامتاماسىز ەتىپ وتىرمىز. سوندىقتان بارلىق ينفراقۇرىلىم ەلدەر اراسىنداعى تاۋار اينالىمىن ارتتىرۋعا باعىتتالعان. سونداي-اق ىشكى نارىقتاعى ازىق-تۇلىك ءتۇرىن كوبەيتۋ جوسپاردا تۇر»، - دەدى ساۋدا جانە ينتەگراتسيا ءمينيسترى.
جۋرناليست «قازاقستاندىقتار قاشان تابىسىنىڭ جارتىسىنان كوبىنەن ازىق-تۇلىككە جۇمساۋدى قويادى؟» دەپ سۇرادى.
«سۇراققا بىلاي جاۋاپ بەرەيىن: «كوپ شىعىننان قورىقپاۋ كەرەك، از تابىس تابۋدان قورقۋ كەرەك». ازىق-تۇلىك پەن تۇتىنۋ تاۋارلارىنا كەلسەك، باعا قۇبىلادى. ءوزىمىزدى قامتاماسىز ەتەتىن جەردە، تۇراقتى جەتكىزىلىم، باسەكەلەستىكتىڭ جوعارى دەڭگەيى بار جەردە باعا نارىققا ساي بولادى. سوندىقتان مۇندا بولجام جاساۋدىڭ دا قاجەتى جوق»، - دەپ جاۋاپ بەردى ساۋدا ءمينيسترى.
