ەكس-پرەزيدەنت نۇرسۇلتان نازارباەۆتىڭ قىزى ءاليا نازارباەۆاعا جانە «روپ وپەراتورىنا» بايلانىستى زاۋىت 1,5 ميلليارد تەڭگەگە ساتىلدى، دەپ "ادىرنا" ۇلتتىق پورتالى قازتاگ اگەنتتىگىنە سىلتەمە جاساپ حابارلايدى.
باعالاۋدا «Recycling Company» جشس رەتىندە كورسەتىلگەن نىسان قاراعاندى وبلىسىندا ورنالاسقان. نازارباەۆتار يەلىك ەتكەن «روپ وپەراتور» زاۋىتى اۆتوقوقىستاردى وڭدەۋى ءتيىس بولاتىن. دەگەنمەن، ساراپتاما نىساندى زاۋىت ساتىلعان سومادان ءۇش ەسە دەرلىك جوعارى باعالاعان.
«ساۋدا ءتۇرى: باعانى كوتەرۋ بويىنشا اۋكتسيون (2021 جىلدىڭ 17 قاڭتارىنان باستاپ). باستاپقى باعاسى: 1 533 241 595 تەڭگە كەپىلدىك: 110 760 000 تەڭگە ساۋدا-ساتتىق جاعدايى: اياقتالدى. ساۋدا-ساتتىقتىڭ باستالۋى: 2024 جىلعى 2 مامىر 11.00. ساتۋ باعاسى: 1 533 241 595 تەڭگە»، - دەلىنگەن مەملەكەتتىك مۇلىك ءتىزىلىمىنىڭ ەلەكتروندىق ساۋدا الاڭىنداعى حابارلامادا.
ەكس-پرەزيدەنت نازارباەۆتىڭ كەنجە قىزى ءاليا نازارباەۆاعا قاتىستى شاعىمدار جيىلەنگەن. 2024 جىلدىڭ 12 ناۋرىزىندا قازتاگ رەداكتسياسى استانا تۇرعىندارى قوقىس تاۋلارىنا شاعىمدانىپ جاتقانىن حابارلاعان. ال قالاداعى قوقىستى شىعاراتىن «Clean City NC» جشس نازارباەۆامەن بايلانىستى ەكەنىن باق بەتتەرىندە جاريالانعان.
ودان بولەك، 2023 جىلدىڭ 26 قىركۇيەگىندە ەكولوگيا جانە تابيعي رەسۋرستار ءمينيسترى بۇرىنعى پرەزيدەنت نۇرسۇلتان نازارباەۆتىڭ قىزى ءاليا نازارباەۆاعا تيەسىلى كومپانيا ەلوردادا قوقىس شىعارۋمەن اينالىسپايتىنىن ايتتى.
«بۇعان دەيىنگى سۇراققا «ءاليا نازارباەۆانىڭ كومپانياسى استانادان قوقىس شىعارمايدى» دەپ جاۋاپ بەردىڭىز. الايدا مەملەكەتتىك ساتىپ الۋلار تۋرالى سايتتى اشساڭىز، وندا 2023 جىلى كومپانيانىڭ ونداعان كەلىسىمشارتقا قول قويعانىن كورۋگە بولادى. دەمەك، ءاليا نازارباەۆاعا تيەسىلى كومپانيا ءالى كۇنگە دەيىن ەلوردادان قوقىس شىعارۋمەن اينالىسىپ كەلە مە؟»، - دەپ سۇرادى تىلشىلەر 2023 جىلدىڭ 26 قىركۇيەگىندە.
ەكولوگيا ءمينيسترى بۇل دەرەكتى تاعى ءبىر تەكسەرىپ شىعۋعا ۋادە بەردى.
«مەندەگى مالىمەتكە سۇيەنسەك، قازىرگى ۋاقىتتا ءاليا نازارباەۆاعا تيەسىلى كومپانيا قوقىس شىعارۋمەن اينالىسىپ جاتقان جوق. قوسىمشا ءمان-جايىن بىلگىڭىز كەلسە، سىزبەن جەكە تالقىلاۋعا دايىنمىن. ءسىز ايتقان دەرەكتەردى دە تاعى ءبىر تەكسەرىپ شىعايىن. سودان كەيىن مينيسترلىكتىڭ ءباسپاسوز قىزمەتى ارقىلى جازباشا جاۋاپ بەرەيىك»، - دەدى ەكولوگيا ءمينيسترى.
2023 جىلدىڭ 20 قىركۇيەگىندە «امانات» پارتياسىنان سايلانعان ءماجىلىس دەپۋتاتى ەرلان سايروۆ پروكۋراتۋرانىڭ نازارىن ەكس-پرەزيدەنتتىڭ كەنجە قىزىنىڭ «روپ وپەراتورى» ىسىندەگى رولىنە اۋداردى. قاڭتار وقيعاسىنان كەيىن كوپ ۇزاماي، 2022 جىلدىڭ 18 قاڭتارىندا نازارباەۆانىڭ قازاقستاننان 312 ميلليون دوللار شىعارۋىنىڭ ىقتيمال سحەماسى دا انىقتالعان.
قازتاگ مالىمەتىنشە، 2022 جىلدىڭ 19 قاڭتارىندا «روپ وپەراتورى» قالدىقتاردى جيناۋ جاۋاپكەرشىلىگىنەن ايىرىلعان. بۇل كومپانيا نازارباەۆامەن بايلانىستى. قىلمىستىق ءىس شۋلى بولعانىمەن، ەكس-پرەزيدەنتتىڭ قىزى سوت پروتسەسىنە ءتىپتى كۋا رەتىندە دە قاتىسقان جوق.
ال 2024 جىلدىڭ 8 ناۋرىزىندا El.kz باسىلىمى («Qazcontent» اق جوباسى) نازارباەۆانىڭ سۋرەتىن قازاقتىڭ كورنەكتى ايەلدەرىمەن قاتار قويعان. ارتىنشا رەداكتسيا ماتەريالدى الىپ تاستاعان.
2024 جىلدىڭ 28 اقپانىندا «TPK Asia» جشس قۇرىلتايشىسى نۇرلان بيمۋرزين سەرىكتەسى مەعدات قاليەۆ ەكەۋى نازارباەۆا مەن روگوۆانىڭ رەيدەرلىك شابۋىلىنىڭ قۇربانى بولعانىن حابارلادى.
«2003 جىلى ءوز ىقپالىن پايدالانا وتىرىپ، قۇنى 170 ميلليون دوللار بولاتىن (2003 جىلعى باعالاۋلار بويىنشا) جەتى مۇناي بازاسى مەن 96 جانارماي قۇيۋ ستانتسياسىنان تۇراتىن جۇمىس ىستەپ تۇرعان كاسىپورىندى باسىپ الدى. رەيد ءۇشىن ول بۇرىنعى يەلەرىن تۇرمەگە قاماپ، دەنە جاراقاتىن سالامىن دەپ قورقىتتى. ونىڭ قوقان-لوققىلارى سەنىمدى بولۋ ءۇشىن، ول كۇندىز الماتىنىڭ ورتالىعىنداعى كاسىپ يەلەرىنىڭ ءبىرىنىڭ اكەسىن اشىقتان-اشىق ۇرلاپ كەتكەن جانە كۋاگەرلەردىڭ ايتۋىنشا، ۇرلاۋعا قۇقىق قورعاۋ قىزمەتكەرلەرىنىڭ قاتىسى بولۋى مۇمكىن»، - دەلىنگەن كاسىپكەرلەر سوزىندە.
2024 جىلدىڭ 14 ناۋرىزىندا باس پروكۋراتۋرا رەيدەرلىك ارەكەتى تۋرالى ارىزدى تىركەگەنىن حابارلادى. الايدا 5 ساۋىردە پوليتسيا ەكس-پرەزيدەنتتىڭ كىشى قىزىنا قاتىستى قىلمىستىق ءىس قوزعاۋدان باس تارتقانى، ال 23 ساۋىردە نازارباەۆانىڭ بيمۋرزينگە قارسى ارىز جازعانى بەلگىلى بولدى.
