بۇگىن - قازاقستاندا مادەنيەت جانە ونەر قىزمەتكەرلەرى كۇنى، دەپ حابارلايدى "ادىرنا" ۇلتتىق پورتالى.
بۇل كۇن تۋعان جەرىمىزدىڭ رۋحاني دامۋىنا جانە باي مادەني مۇرامىزدى دارىپتەۋگە زور ۇلەس قوسىپ جۇرگەن جانداردى بىرىكتىرگەن، شىعارماشىلىق ادامدارىنا دەگەن ايرىقشا قۇرمەتتىڭ بەلگىسى، ءاربىر مادەنيەت قىزمەتكەرلەرىنىڭ ءتول مەرەكەسى بولىپ سانالادى.
قر مادەنيەت جانە اقپارات ءمينيسترى ايدا بالاەۆا مادەنيەت جانە ونەر قىزمەتكەرلەرىن مەرەكەمەن قۇتتىقتادى.
" سىزدەردى مادەنيەت جانە ونەر قىزمەتكەرلەرى كۇنىمەن شىن جۇرەكتەن قۇتتىقتايمىن! بۇل كۇن – ادامزاتتى ىزگىلىككە باۋلىپ، مەيىرىمگە ۇندەيتىن، سۇلۋلىققا قۇشتار، جاراستىققا تولى الەمگە سەنەتىن، بولاشاق ءۇشىن جاسامپازدىققا باستايتىن ارداقتى كاسىپ يەلەرىنىڭ مەرەكەسى.
بۇگىندە ءبىزدىڭ ەلىمىزدە 8 مىڭعا جۋىق مادەنيەت وشاعى بار، وندا 64 000-نان استام قىزمەتكەر جۇمىس ىستەيدى. ونىڭ ىشىندە تەاتر، مۋزەي، كىتاپحانا، كونتسەرتتىك ۇيىمدار، ونەر گالەرەيالارى مەن باسقا دا كوپتەگەن مەكەمەلەردى ەرەكشە اتاپ وتۋگە بولادى. سىزدەردىڭ قاجىرلى قىزمەتتەرىڭىز ارقىلى قازاقستاننىڭ باي مادەني مۇراسى ساقتالىپ، وركەندەپ-دامىپ كەلەدى.
سىزدەردىڭ ەڭبەكتەرىڭىز مەملەكەتتىك دەڭگەيدە جوعارى باعالاندى: 2023 جىلى مادەنيەت قىزمەتكەرلەرىنىڭ جالاقىسى 2021 جىلمەن سالىستىرعاندا 45% ءوستى. 30 جىلدا العاش رەت «حالىق ءارتىسى» قۇرمەتتى اتاعى تاعايىندالىپ، اتاق سەگىز كورنەكتى مادەنيەت قايراتكەرىنە بەرىلدى. سونىمەن قاتار «مادەنيەتارالىق جانە ەتنوسارالىق بىرلىكتى نىعايتۋ باعىتىندا مادەنيەت پەن ونەر سالاسىنداعى ۇزدىك جۇمىستار مەن تۋىندىلار ءۇشىن» سىيلىعى تاعايىندالدى.
2023 جىلى مەملەكەتتىك قولداۋمەن تۇسىرىلگەن 18 ءفيلمنىڭ ءوندىرىسى اياقتالىپ، 19 جاڭا كينوجوبا جاسالدى", - دەلىنگەن مينيستر قۇتتىقتاۋىندا.
ودان بولەك، ايدا بالاەۆا قۇتتىقتاۋ حابارلاماسىندا ەلىمىزدىڭ مادەني مۇراسىن ناسيحاتتاۋعا ۇلەس قوسىپ جۇرگەندەرگە العىسىن ءبىلدىردى.
«قازاقانيماتسيا» شىعارماشىلىق بىرلەستىگى اياسىندا 12 قازاقستاندىق ستۋدەنت پەن مامان انكارا، ىستانبۇل جانە كراكوۆتاعى انيماتسيا ستۋديالارىندا وقىدى.
وتكەن جىلى ق.قۋانىشباەۆ اتىنداعى اكادەميالىق قازاق مۋزىكالىق-دراما تەاترىنا جانە «ازىرەت سۇلتان» تاريحي-مادەني مۋزەي-قورىعىنا «ۇلتتىق» مارتەبەسى بەرىلدى.
ەلىمىزدىڭ مادەني مۇراسىن شەتەلدە ناسيحاتتاۋعا قوسقان باعا جەتپەس ۇلەسىڭىز ءۇشىن ەرەكشە العىسىمدى بىلدىرەمىن.
سىزدەردىڭ ەڭبەگىڭىز بەن شىعارماشىلىقتارىڭىز ءبىزدىڭ مادەنيەتىمىزدى بايىتىپ قانا قويماي، الەمگە قازاقستاندىق داستۇرلەردىڭ، ونەر مەن تاريحتىڭ بايلىعىن پاش ەتەدى
سىزدەر ارقىلى قازاقستاندى شەت ەلدەر بىرەگەي مادەني مۇراسى بار مەملەكەت رەتىندە تانيدى. مادەنيەت قىزمەتكەرلەرى كورمە، كونتسەرت، تەاتر قويىلىمدارىن وتكىزىپ، حالىقارالىق فەستيۆالدار مەن بايقاۋلارعا قاتىسادى، وسىلايشا الەمدىك ارەنادا ءبىزدىڭ مادەنيەتىمىزدى تانىستىرادى. وزدەرىڭىزدى ونەر مەن شىعارماشىلىق ارقىلى ەلدەر اراسىنداعى دوستىق پەن ىنتىماقتاستىقتى جالعاپ وتىرعان التىن كوپىر ءارى ناعىز مادەنيەت ەلشىلەرى دەپ بىلەمىز.
سىزدەرگە جانكەشتى جۇمىستارىڭىز بەن ءوز ىستەرىڭىزگە دەگەن ادالدىقتارىڭىز ءۇشىن جانە حالىقارالىق ارەنادا قازاقستاننىڭ ءيميدجىن نىعايتۋعا قوسقان زور ۇلەستەرىڭىز ءۇشىن العىس ايتامىن. سىزدەر ارقالاعان مىندەت – اسقار تاۋداي بيىك، سىزدەر اڭساعان مۇرات – ماڭگىلىك. سىزدەر اتقارعان قىزمەت – ەلىمىز ءۇشىن اسا ماڭىزدى.
بارشاڭىزعا زور دەنساۋلىق، شىعارماشىلىق تابىس، كۇش-قۋات جانە جارقىن جەتىستىكتەر تىلەيمىن!" - دەپ قورىتىندىلادى مادەنيەت جانە اقپارات ءمينيسترى.
