ەكىباستۇزدا 8 ايلىق ءسابي اشتان قايتىس بولدى، دەپ حابارلايدى "ادىرنا" ۇلتتىق پورتالى.
بۇل تۋرالى پاۆلودار وبلىستىق سوتىنىڭ ءباسپاسوز قىزمەتى مالىمدەدى. وقيعا 2023 جىلدىڭ 10-17 قاراشاسىندا بولعان.
وبلىستىق سوتتىڭ مالىمەتىنشە ت. ەسىمدى تۇرعىنعا قاتىستى قىلمىستىق ءىس ابايسىزدا قازاعا ۇشىراتۋ فاكتىسى بويىنشا قوزعالعان.
"ت. ەسىمدى تۇرعىن 2023 جىلدىڭ 10-17 قاراشاسى ارالىعىندا ەكىباستۇز قالاسى شىدەرتى اۋىلىندا تۇرىپ، سەگىز ايلىق بالاسىنا قىلمىستىق نەمقۇرايدىلىق تانىتىپ، ونى جەتكىلىكتى تاماقپەن قامتاماسىز ەتپەگەن. ونىڭ ابايسىزدىعى بالانىڭ ولىمىنە اكەپ سوققان", - دەلىنگەن حابارلامادا.
كەلىنشەك ءوز كىناسىن مويىنداپ، ىستەگەن ىسىنە وكىنەتىنىن ايتتى. ونىڭ كىناسى سوت-مەديتسينالىق ساراپتاماسىنىڭ قورىتىندىسى، ساراپشىنىڭ ايعاقتارى جانە سوتتا زەرتتەلگەن باسقا دا قۇجاتتامالىق، زاتتاي دالەلدەمەلەر ارقىلى راستالىپ وتىر.
سوت اناعا قاتىستى 1 جىلعا باس بوستاندىعىنان ايىرۋ جازاسىن تاعايىندادى. ال كەلىنشەكتىڭ قالعان ەكى جاس بالاعا قاتىستى اتا-انا قۇقىعى شەكتەلدى.
