Екібастұзда 8 айлық сәби аштан қайтыс болды, деп хабарлайды "Адырна" ұлттық порталы.
Бұл туралы Павлодар облыстық сотының баспасөз қызметі мәлімдеді. Оқиға 2023 жылдың 10-17 қарашасында болған.
Облыстық соттың мәліметінше Т. есімді тұрғынға қатысты қылмыстық іс абайсызда қазаға ұшырату фактісі бойынша қозғалған.
"Т. есімді тұрғын 2023 жылдың 10-17 қарашасы аралығында Екібастұз қаласы Шідерті ауылында тұрып, сегіз айлық баласына қылмыстық немқұрайдылық танытып, оны жеткілікті тамақпен қамтамасыз етпеген. Оның абайсыздығы баланың өліміне әкеп соққан", - делінген хабарламада.Келіншек өз кінәсін мойындап, істеген ісіне өкінетінін айтты. Оның кінәсі сот-медициналық сараптамасының қорытындысы, сарапшының айғақтары және сотта зерттелген басқа да құжаттамалық, заттай дәлелдемелер арқылы расталып отыр. Сот анаға қатысты 1 жылға бас бостандығынан айыру жазасын тағайындады. Ал келіншектің қалған екі жас балаға қатысты ата-ана құқығы шектелді.
