مۇحتار ءابليازوۆتىڭ تاعى ءبىر "سىبايلاسى" دەلىنگەن ادام قازاقستانعا ءوز ەركىمەن ورالدى، دەپ حابارلايدى "ادىرنا" ۇلتتىق پورتالى.
انتيكوردىڭ مالىمەتىنشە، 15 مامىر كۇنى ينتەرپول كومەگىمەن ءابليازوۆتىڭ سىبايلاسى سانالعان الەكسەي بوگدانوۆ بەلگيانىڭ بريۋسسەل قالاسىنان الماتىعا كەلدى. قۇزىرلى ورگاننىڭ مالىمەتىنشە بوگدانوۆ كىناسىن تولىق مويىنداپ، ءوز ەركىمەن ەلگە ورالعان سوڭ وعان قاتىستى بۇرىن سايلانعان قاماۋدا ۇستاۋ تۇرىندەگى بۇلتارتپاۋ شاراسى كەپىلگە وزگەرگەنى بەلگىلى بولدى.
«سىبايلاس جەمقورلىققا قارسى قىزمەتتىڭ باسشىلىعىمەن ۆەدومستۆوارالىق جەدەل-تەرگەۋ توبى «بتا بانكى» اق بۇرىنعى توپ-مەنەدجمەنتىنە قاتىستى ۇيىمداسقان قىلمىستىق توپقۇرامىندا جاسالعان اقشانى، ونىڭ ىشىندە شەتەلدە جىمقىرۋ جانە جىلىستاتۋ فاكتىلەرى بويىنشا قىلمىستىق ءىستى ودان ءارى تەرگەپ جاتىر. قىلمىستىق ءىس بويىنشا 2009 جىلدان بەرى ىزدەۋدە جۇرگەن م.ءابليازوۆتىڭ تاعى ءبىر سىبايلاسى - الەكسەي بوگدانوۆ قازاقستانعا ءوز ەركىمەن قايتارىلدى»، - دەپ حابارلادى انتيكور.
باق-تاعى اقپارات بويىنشا، الەكسەي بوگدانوۆ «Metropolitan Manageres Corp» (BVI) وففشورلىق كومپانياسىنىڭ نومينالدى وكىلى، «بەلوۆود كراحمال كومبيناتى» جاق باسقارما توراعاسى جانە «مايس اگرو» جشس مامانى رەتىندە بانكتىڭ 300 ملن تەڭگەدەن استام سوماعا اقشا قاراجاتىن جىمقىرعان. ول 2009 جىلدان بەرى ىزدەۋدە جۇرگەن بولاتىن.
