قر اسكەري سوتى ۇلتتىق ۇلاننىڭ 5 اسكەري قىزمەتشىسىنە قاتىستى قىلمىستىق ءىستى قايتا قارادى، دەپ حابارلايدى "ادىرنا" ۇلتتىق پورتالى.
بۇرىن سوت ۇكىمىمەن د.، ۋ.، س.، ە. اسا ءىرى مولشەردە بوتەننىڭ مۇلكىن جىمقىرعاندارى ءۇشىن كىنالى دەپ تانىلىپ (قر قك-ءنىڭ 189-بابى 4-بولىگىنىڭ 2-تارماعى), ولارعا 9 جىلدان 10 جىلعا دەيىن باس بوستاندىقتارىنان ايىرۋ تۇرىندەگى جازا تاعايىندالعان. سوتتالعان ا. قىزمەتىنە سالعىرت قاراۋ سالدارىنان اۋىر زارداپتارعا اكەلگەنى ءۇشىن كىنالى دەپ تانىلىپ (قر قك-ءنىڭ 453-بابىنىڭ 2-بولىگى), وعان 2 جىل 6 اي مەرزىمگە باس بوستاندىعىنان ايىرۋ تۇرىندەگى جازا تاعايىندالدى. اسكەريلەردەن ورتاق تارتىپتە كەلتىرىلگەن ماتەريالدىق زالال دا وندىرىلگەن.
"2019-2022 جىلدار ارالىعىندا اسكەري قىزمەتشى د.، ۋ.، س. جانە ە. وزدەرىنىڭ قىزمەتتىك جاعدايىن پايدالانا وتىرىپ، پايدا تابۋ ماقساتىندا الدىن الا ءسوز بايلاسۋ ارقىلى بىرنەشە مارتە اسكەري ءبولىمنىڭ جانار-جاعارماي ماتەريالدارىن جىمقىرۋ ارقىلى 448 ملن تەڭگەدەن استام زالال كەلتىرگەن. ۇرلانعان وتىندى جەكە تۇلعالارعا وتكىزگەن. ءوز كەزەگىندە سوتتالۋشى ا. قىزمەتىنە سالعىرت قاراعان، ياعني اسكەري ءبولىمنىڭ بۇكىل ججم قىزمەتىنىڭ جۇمىسىنا باقىلاۋدىڭ بولماۋىنا بايلانىستى مەملەكەتكە ماتەريالدىق زالال كەلتىردى", – دەلىنگەن حابارلامادا.
الايدا سوتتىڭ قىلمىستىق ىستەر جونىندەگى سوت القاسى اپەللياتسيالىق تارتىپتە قىزمەتكە سالعىرت قاراۋ جانە اسا ءىرى مولشەردە جانار-جاعارماي جىمقىرۋ فاكتىسى بويىنشا ايىپتالعان ۇلتتىق ۇلاننىڭ 5 اسكەري قىزمەتشىسىنىڭ ۇستىنەن قوزعالعان قىلمىستىق ءىستى قايتا قارادى.
سوتتالۋشىلاردىڭ ءوز ايعاقتارىمەن، جابىرلەنۋشى تاراپ وكىلدەرى مەن كۋاگەرلەردىڭ جاۋاپتارىمەن، ءىس بويىنشا جۇرگىزگەن اۋديتورلىق تەكسەرۋمەن، سوت ساراپتامالارىمەن، تەلەفونمەن سويلەسۋ ستەنوگراممالارىمەن، اقشا اۋدارۋ جانە قىلمىستىق ءىستىڭ باسقا ماتەريالدارىمەن انىقتالدى.
"قر اسكەري سوتىنىڭ قىلمىستىق ىستەر جونىندەگى سوت القاسىنىڭ 2024 جىلعى 14 مامىرداعى قاۋلىسىمەن اقمولا گارنيزونى اسكەري سوتىنىڭ 2024 جىلعى 13 اقپانداعى ۇكىمى سوتتالعان س.-عا قاتىستى جازا مەرزىمىندە قاماۋدا ۇستاۋ ۋاقىتىن ەسەپكە جاتقىزۋ بولىگىندە وزگەرتىلدى. قالعان بولىگىندە ۇكىم وزگەرىسسىز قالدى", – دەلىنگەن سوت حابارلاماسىندا.
