قر مادەنيەت جانە اقپارات ءمينيسترى ايدا بالاەۆا قازاقستان حالقىن جەڭىس كۇنىمەن قۇتتىقتادى، دەپ حابارلايدى “ادىرنا” ۇلتتىق پورتالى.
«بارشاڭىزدى ەلىمىز حالقى جانە الەم جۇرتى ءۇشىن ماڭىزدى مەرەكە – جەڭىس كۇنىمەن قۇتتىقتايمىن. بۇل كۇنى ءبىز بولاشاعىمىز ءۇشىن، بەيبىتشىلىك پەن تۇراقتىلىق جولىندا جانىن قيعان ەرلەردى ەسكە الامىز. جەڭىس كۇنى قارساڭىندا پرەزيدەنتىمىز قاسىم-جومارت كەمەلۇلى «وتان انا» ەسكەرتكىشىنە گۇل شوقتارىن قويىپ، ەكىنشى جاھان سوعىسىندا قازا تاپقان قازاق جاۋىنگەرلەرىن ءبىر مينۋت ۇنسىزدىكپەن ەسكە الدى»، – دەدى ايدا بالاەۆا ءوز پاراقشاسىندا جازعان قۇتتىقتاۋىندا.
ول مەملەكەت باسشىسىنىڭ قۇتتىقتاۋىن ەسكە ءتۇسىردى.
«ەل حالقىن جەڭىس كۇنىمەن قۇتتىقتاعان مەملەكەت باسشىسى بەيبىتشىلىكتى ساقتاۋ مەن نىعايتۋدىڭ ماڭىزدىلىعىن ەسكە سالدى... جەڭىس كۇنىنە وراي بارلىق وڭىردە ادامزات تاريحىنداعى ەڭ قاندى سوعىستا قازا تاپقان جاۋىنگەرلەردىڭ ەسكەرتكىشتەرىنە گۇل شوقتارىن قويۋ ءراسىمى وتۋدە... كەلەر جىلى ءبىز ۇلى جەڭىستىڭ 80 جىلدىعىن تويلايمىز. مەملەكەت باسشىسىنىڭ كەڭ كولەمدە اتاپ وتۋگە دايىندىق جونىندەگى تاپسىرماسىن ورىنداۋ شەڭبەرىندە، سوعىس جىلدارىندا تەڭدەسسىز ەرلىك كورسەتكەن جەرلەستەرىمىزدى ەستە قالدىرۋ، ەكىنشى جاھان سوعىسىنداعى وقيعالارعا قاتىستى زەرتتەۋلەر جانە مۇراعات ماتەريالدارىن زەردەلەۋ جۇمىستارى كۇشەيتىلەدى. سونداي-اق رەسپۋبليكا بويىنشا ەلدى مەكەندەردىڭ، نىسانداردىڭ، كوشەلەردىڭ اتاۋلارىندا سوعىس قاھارماندارىن ماڭگى قالدىرۋ تاجىريبەسى جالعاسپاق»، – دەپ جازدى مينيستر.
جەڭىس كۇنى – باتىرلارىمىزدىڭ ەرلىكتەرىن ەسكە الاتىن كۇن.
«بەيبىتشىلىك پەن ىنتىماقتى قاستەرلەۋ، ەركىندىك پەن تاۋەلسىزدىكتى باعالاۋ كەرەكتىگىن ەسكە سالادى. ەلىمىزدە بەيبىتشىلىك پەن كەلىسىمدى ساقتاۋ ءۇشىن ارقايسىمىز قولدان كەلگەننىڭ ءبارىن جاساپ كەلەمىز. قازا تاپقان قاھارمانداردىڭ ەسىمى ماڭگى جادىمىزدا جاڭعىرىپ، ەرلىكتەرى ۇرپاقتان-ۇرپاققا جەتە بەرەرى ءسوزسىز»، – دەدى ايدا بالاەۆا.
