قازاقستاننان قانت ەكسپورتىنا تىيىم سالۋ تۋرالى شەشىم قابىلداندى، دەپ حابارلايدى "ادىرنا" ۇلتتىق پورتالى.
ۇكىمەت ەاەو-عا قاتىسۋشى ەلدەرگە قانت ەكسپورتىنا 2024 جىلدىڭ 31 تامىزىنا دەيىن ۋاقىتشا تىيىم سالۋدى ەنگىزۋ تۋرالى شەشىم قابىلدانعانىن حابارلادى. تىيىم جاز سوڭىنا دەيىن، ەلدە قانت قىزىلشاسىنىڭ جاڭا ءونىمى پىسكەنشە كۇشىندە بولاتىنى انىقتالىپ وتىر.
6 مامىر كۇنى ۆيتسە-پرەمەر سەرىك جۇمانعاريننىڭ توراعالىعىمەن وتكەن وتىرىستا قانت قىزىلشاسىنىڭ جاڭا ءونىمى جينالعانعا دەيىن ىشكى نارىقتى قانتپەن قامتاماسىز ەتۋ ماسەلەلەرى قارالدى.
"بۇگىندە قويمالارداعى قانت پەن شيكى قۇراق قورى 136 مىڭ توننا. 2024 جىلدىڭ 31 تامىزىنا دەيىن كۆوتامەن رەسەيلىك قانتتىڭ 120 مىڭ توننا كولەمىندەگى يمپورتىن قوسقاندا، بۇل شامامەن 256 مىڭ تونناعا دەيىن جەتەدى", — دەدى اۋىل شارۋاشىلىعى ۆيتسە-ءمينيسترى ەربول تاسجۇرەكوۆ.
سونداي-اق، قازاقستاندا 2024 جىلدىڭ سوڭىنا دەيىن وڭدەۋگە ارنالعان 300 مىڭ توننا شيكى قۇراقتى باجسىز اكەلۋگە كۆوتا بار ەكەنى دە ايتىلدى.
"ورتا ەسەپپەن ايلىق تۇتىنۋ جازدا 46 مىڭ توننا، سۇرانىس 60 مىڭ تونناعا جەتەدى. قولدانىستاعى قانت قورى جاڭا ونىمگە دەيىن قانتقا دەگەن سۇرانىستى وتەۋگە جەتكىلىكتى", - دەپ تۇيىندەدى ۆيتسە-مينيستر.
