ازەربايجان استاناسى باكۋدە تۇركى الەمىنىڭ ورتاق ءالىپبيى جونىندەگى كوميسسياسىنىڭ ەكىنشى وتىرىسى ءوتتى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
اتالعان جيىندى تۇركى اكادەمياسى ازەربايجان ۇلتتىق عىلىم اكادەمياسى ناسيمي اتىنداعى ءتىل ءبىلىمى ينستيتۋتىنىڭ قولداۋىمەن، اتاتۇرىك اتىنداعى مادەنيەت، ءتىل جانە تاريح جوعارى كەڭەسى جانىنداعى تۇرىك ءتىلى قوعامىمەن بىرلەسىپ ۇيىمداستىردى. وندا باۋىرلاس مەملەكەتتەردىڭ وكىلدەرى ورتاق ءالىپبي يدەياسىن ىلگەرىلەتۋ جانە وسى باعىتتاعى جاڭا قادامداردى تالقىلادى. كوميسسيا وتىرىسىنىڭ اشىلۋ سالتاناتىندا ءسوز سويلەگەن شاھين مۇستافاەۆ ورتاق ءالىپبي ماسەلەسى — تۇركى حالىقتارى ىنتىماقتاستىعىنىڭ ماڭىزدى باعىتى ەكەنىن اتاپ ءوتتى.
«تۇركى الەمىنىڭ بىرلىگىن نىعايتۋ ءۇشىن ءالىپبي بىرلىگىنە دە ءمان بەرىلۋى ءتيىس. سوڭعى جىلدارى تۇركى مەملەكەتتەرى اراسىنداعى ىنتىماقتاستىق ينستيتۋتسيونالدى سيپاتقا يە بولعان سايىن، ورتاق ءالىپبي ماسەلەسى كۇن تارتىبىندە ءجيى كوتەرىلە باستادى، - دەدى مۇستافاەۆ.
باسقوسۋعا تۇرىك ءتىلى قوعامىنىڭ پرەزيدەنتى وسمان مەرت، ازەربايجان ۇلتتىق عىلىم اكادەمياسىنىڭ پرەزيدەنتى يسا گابيببەيلي، اتاتۇرىك ورتالىعىنىڭ توراعاسى نيزامي دجافاروۆ جانە تمۇ اقساقالدار كەڭەسىنىڭ مۇشەسى گاسان گاسانوۆ، سونىمەن قاتار تۇركى مەملەكەتتەرى ۇيىمىنا مۇشە ەلدەردەن جانە باقىلاۋشى مەملەكەتتەردەن كەلگەن كوميسسيا مۇشەلەرى مەن ءتىل ءبىلىمى سالاسىنداعى عىلىمي-زەرتتەۋ ينستيتۋتتاردىڭ عالىمدارى قاتىستى.
ايتا كەتەيىك، تۇركى اكادەمياسىنىڭ بازاسىندا جۇمىس ىستەيتىن كوميسسيا ءار تاراپتان لينگۆيستيكالىق سالاعا جاۋاپتى ەكى مۇشەنىڭ قاتىسۋىمەن قۇرىلعان ەدى. كوميسسيانىڭ العاشقى وتىرىسى 2023 جىلدىڭ 29 مامىرىندا استانا قالاسىندا ءوتىپ، بىرقاتار ماڭىزدى شەشىم قابىلدانعان بولاتىن.
