بۇگىن، 3 مامىر كۇنى استانا سوتىندا وتكەن جارىسسوزدە بۇرىنعى ۇلتتىق ەكونوميكا ءمينيسترى قۋاندىق بيشىمباەۆتىڭ اناسى — قىلمىستىق ءىس بويىنشا قوعامدىق قورعاۋشى الميرا نۇرلىبەكوۆا ءسوز سويلەدى، دەپ حابارلايدى «ادىرنا» ءتىلشىسى.
«بولعان جاعداي ءۇشىن سالتاناتتىڭ وتباسىنان كەشىرىم سۇرايمىز. قۋاندىق تراگەدياعا اينالعان ارەكەت جاسادى. جابىرلەنۋشى تاراپ ۇلىمدى قوعام ءپارازيتى، «ەسكى قازاقستاننىڭ» ادامى دەپ اتادى. قورعاۋشىلار قازاقستاندى سوڭعى 30 جىلدا باسقارعان بارلىق شەنەۋنىك ءۇشىن ونىڭ جازاعا تارتىلۋى كەرەك ەكەنىن مالىمدەدى. قوعامنىڭ بارلىق كۇناسى مەن قيىندىعىن ءبىر ادامعا، مەنىڭ ۇلىما ارتپاۋدى سۇرايمىن. مەن ۇلىما ءادىل بولىپ، اياۋشىلىق تانىتۋدى وتىنەمىن. ءومىرىمنىڭ سوڭىنا دەيىن تاربيە بەرۋدە قاي جەردە قاتەلەسكەنىمدى سارالايتىن بولامىن»،—دەدى ەكس-ءمينيستردىڭ اناسى.
