ەگەر قۋاندىق بيشىمباەۆ سالتانات نۇكەنوۆانى ولتىرگىسى كەلسە، كيللەر جالدايتىن ەدى. بۇل تۋرالى ەكس-ءمينيستردىڭ قورعاۋشىسى ەرلان عازىمجانوۆ ءجارىسسوز كەزىندە ايتتى، دەپ حابارلايدى «ادىرنا» ءتىلشىسى.
«ايىپتالۋشىنىڭ سوققى الدىنداعى ءىس-ارەكەتى، سوققى جاساپ جاتقانداعى ءىس-ارەكەتى مەن سوققىدان كەيىنگى ءىس-ارەكەتى ونىڭ ولتىرۋگە نيەتى بولماعانىنىڭ ماڭىزدى دالەلى بولىپ وتىر. نۇكەنوۆانى ۇرىپ-سوعۋعا دەيىنگى مىنەز-قۇلقىن تالدايىق. ەلەستەتىپ كورەيىكشى، ەگەر بيشىمباەۆ كىسى ولتىرۋگە شەشىم قابىلداسا، ول مۇنى ءوز قولىمەن جاساي ما؟ كىسى ءولتىرۋ ءۇشىن كاسىبي ادامدى جالداۋ الدەقايدا قاۋىپسىز. بيشىمباەۆتىڭ بۇل ىسكە قاتىسى بارىن ەشكىم دە بىلمەيتىن ەدى. الايدا ول كيللەر جالداۋعا تالپىنعان جوق»،—دەدى عازىمجانوۆ.
ادۆوكات بۇنداي جاعدايدا بيشىمباەۆ بارلىعىن الدىن الا ءبارىن جوسپارلاپ، نۇكەنوۆانى قاۋىپسىز جەرگە اپارار ەدى دەگەن پىكىر ءبىلدىردى.
«جابىرلەنۋشى تاراپتىڭ «بيشىمباەۆ نۇكەنوۆانى ديما بيلاننىڭ كونتسەرتى كەزىندە ءولتىرۋدى جوسپارلاپ قويدى» دەگەن سوزدەرى مۇلدەم اقىلعا قونىمسىز. ولار ايىپتالۋشىنىڭ «پالتونى تاستاپ كەت، ول ساعان ەندى كەرەك ەمەس» دەگەن سوزدەرى سوعان دالەل ەكەنىن ايتىپ وتىر. القابيلەردىڭ بىرەۋى وسىعان سەنە مە؟ نەلىكتەن ول كىسى ءولتىرۋدى مۇنشا سوزادى؟ نەلىكتەن تاڭعا دەيىن قارىم-قاتىناسىن تالدايدى؟ ونىڭ وكپە-نازىن تىڭداپ، ءبىر نارسەنى دالەلدەيدى. بۇنىڭ ءبارى نە ءۇشىن كەرەك؟ ونى قالا سىرتىنا اپارىپ، ءولتىرىپ، ارتىنان كومە سالعان وڭايىراق ەمەس پە؟»— دەدى قورعاۋشى.
ايتا كەتەيىك، استانادا بيشىمباەۆ ءىسى بويىنشا تاراپتاردىڭ ءجارىسسوزى ءوتىپ جاتىر.
